"దాడులను మోదీనే ప్రశ్నిస్తున్నారు"

రఫేల్ యుద్ధవిమానాలు ఉండి ఉంటే పరిస్థితి మరోలా ఉండేదంటున్న మోదీ వ్యాఖ్యలను బట్టి చూస్తే ఇటీవల జరిగిన వైమానిక దాడులను ప్రధాని మోదీయే తప్పుబడుతున్నారని స్పష్టమవుతోందని కాంగ్రెస్ ఆరోపించింది.

ప్రధానమంత్రి నరేంద్రమోదీపై విమర్శలు గుప్పించింది కాంగ్రెస్​. ఉగ్ర శిబిరాలపై ఇటీవల చేపట్టిన వైమానిక దాడులపై ప్రధానమంత్రే ప్రశ్నిస్తున్నారని, ప్రతిపక్షాలు ఆధారాలు అడగట్లేదని గమనించాలని కాంగ్రెస్​ అధికార ప్రతినిధి మనీష్​ తివారి పేర్కొన్నారు.

రఫేల్​ యుద్ధ విమానాలు ఉండి ఉంటే ఫలితాలు మరోలా ఉండేవన్న ప్రధాని వ్యాఖ్యలను తప్పుబట్టారు తివారి. ప్రధాని ప్రకటనలోని ఆంతర్యమేమిటని ప్రశ్నించారు. గత ప్రభుత్వం ఫ్రాన్స్​తో చేసుకున్న ఒప్పందం, చర్చలను మోదీ ప్రభుత్వం రద్దు చేయటంతోనే రఫేల్​ అప్పగింతలో జాప్యం ఏర్పడిందని ఆరోపించారు.

" వైమానిక దాడులను ఎవరు ప్రశ్నించారు?. ప్రతిపక్షాలు ప్రశ్నించలేదు. దాడులపై ప్రశ్నించింది భారత ప్రధానమంత్రినే. ఇలాంటి పరిస్థితి ఇంత వరకు జరగలేదు. మనవద్ద రఫేల్​ ఉండి ఉంటే ఫలితాలు వేరే ఉండేవి, పరిస్థితులు వేరే ఉండేవని ప్రధాని అన్నారు. మీరు రఫేల్​ కాంట్రాక్టును, గతంలోని చర్చలను రద్దు చేయటంతోనే రఫేల్​ అప్పగింతలో జాప్యం ఏర్పడింది. మీ ప్రకటనలోని ఆంతర్యమేమిటి ?" - మనీష్​ తివారీ, కాంగ్రస్​ అధికార ప్రతినిధి