ఒడిశా నబరంగ్పుర్ జిల్లాలోని కుసుమ్కుంఠ గ్రామంలో ఓ నిండు గర్భిణిని ప్రాణాపాయం నుంచి రక్షించారు దబుగావ్ ఎమ్మెల్యే మనోహర్ రన్ధారీ. అడవిలో ఉన్న ఆ గ్రామంలో ప్రసవ వేదనతో సతమతమవుతున్న జీమా బెహరా అనే మహిళను సమయానికి ఆసుపత్రికి చేరుకునేలా సాయపడ్డారు. పురుటి నొప్పులతో బాధపడుతున్న గర్భిణిని.. దట్టమైన అడవుల గుండానే భుజాలపై డోలిలో మరికొందరి సాయంతో మోసుకెళ్లారు.
సమస్యలు తెలుసుకునేందుకు వెళ్తే
కుసుమ్కుంఠ గ్రామానికి చెందిన జీమా బెహరా అనే మహిళ పురిటి నొప్పులతో బాధపడుతోంది. క్షణక్షణానికీ ఆమె ఆరోగ్య పరిస్థితి క్షీణిస్తోంది. ఆ గ్రామం దట్టమైన అడవి మధ్యలో ఉన్నందున ఆ ఊరికి సరైన రోడ్డు మార్గం లేదు. కనీసం ద్విచక్రవాహనం కూడా వెళ్లలేని పరిస్థితి.
గర్భిణి కుటుంబ సభ్యులు, గ్రామస్థులకు ఏం చేయాలో పాలుపోలేదు. అప్పుడే ప్రజా సమస్యలు తెలుసుకునేందుకు అటుగా వచ్చిన దబుగావ్ ఎమ్మెల్యే మనోహర్ రన్ధారీ కంటపడ్డారు. వెంటనే ఈ విషయాన్ని ఎమ్మెల్యే దృష్టికి తీసుకెళ్లారు స్థానికులు. త్వరితగతిన స్పందించిన ఎమ్మెల్యే... వాహనం కోసం వేచి చూడకుండా డోలీపై గర్భిణిని తీసుకెళ్లేందుకు పూనుకున్నారు. కొద్దిదూరం అడవిలోనే నడక సాగించి.. ఆ తర్వాత తన సొంత వాహనంలో ఆమెను ఆసుపత్రికి చేర్చారు.
ఇదీ చూడండి: ఈ నెల 24న భారత్కు అమెరికా అధ్యక్షుడు ట్రంప్