12 ఏళ్ల బాలుడు... 135 పుస్తకాలు రచించాడు!

ఉత్తరప్రదేశ్​లోని అయోధ్యలో ఓ బాల మేధావి అద్భుతాలు సృష్టిస్తున్నాడు. సుల్తాన్​పుర్​కు చెందిన మృగేంద్ర రాజ్​ బాల్యంలోనే రచయిత అవతారమెత్తాడు. ఆరేళ్ల వయస్సు నుంచి పుస్తకాలను రాయడం ప్రారంభించాడు. ఆజ్​ కా అభిమన్యు పేరుతో 135 పుస్తకాలను రచించి నాలుగు ప్రపంచ రికార్డులు సొంతం చేసుకున్నాడు.

పువ్వు పుట్టగానే పరిమళిస్తుంది అనడానికి చక్కని నిదర్శనం ఉత్తరప్రదేశ్​లోని అయోధ్య ప్రాంతానికి చెందిన మృగేంద్ర రాజ్. సుల్తాన్​పుర్​కు చెందిన బాల మేధావి 12 ఏళ్ల వయసులోనే 135 పుస్తకాలను రచించాడు. చిన్నారుల కథల పుస్తకాలు రాశాడేమో అని తేలిగ్గా తీసుకోద్దండోయ్. ఈ గడుగ్గాయి డీల్​ చేసినవి ఎలాంటి అంశాలో తెలిస్తే మీరు తప్పకుండా ఆశ్చర్యపోతారు.

'ఆజ్​ కా అభిమన్యు'(నేటి కాలపు అభిమన్యుడు) అనే కలం పేరుతో చేసిన రచనల్లో మతానికి సంబంధించిన పుస్తకాలు, మహాత్ముల జీవిత చరిత్రలు ఉన్నాయి. యూపీ సీఎం యోగి ఆదిత్యనాథ్ జీవితాన్నీ పుస్తకంలోకి ఎక్కించాడు ఈ రాబోయే తరానికి సిసలైన ప్రతినిధి. ​

ఆరేళ్ల వయస్సులో తొలి పుస్తకం

తన తొలి రచనను ఆరేళ్ల వయస్సులోనే చేశాడు ఈ ఆధునిక అభిమన్యుడు.

"రామాయణంలోని 51 పాత్రలను విశ్లేషించి పుస్తకాలు రాశాను. ప్రతి పుస్తకం 25 నుంచి 100 పేజీల మధ్య ఉంటుంది. ప్రపంచ రికార్డుల విశ్వవిద్యాలయం వారు డాక్టరేట్​నూ అందిస్తామన్నారు."
-మృగేంద్ర రాజ్, బాల రచయిత

ఈ అభినవ అభిమన్యుడి తల్లి ప్రైవేటు పాఠశాలలో టీచర్. తండ్రి రాష్ట్ర చెరకు పరిశ్రమలో పనిచేస్తున్నారు.

పెద్దయ్యాక రచయిత కావడం తన లక్ష్యమన్నాడు ఈ బాల మేధావి. వివిధ రంగాలకు సంబంధించిన అనేక పుస్తకాలను రచిస్తానని స్పష్టం చేశాడు.

ఇదీ చూడండి: 'జల యోగా'తో ప్రపంచ రికార్డుపై బుడతడి గురి!