కొవిడ్-19 మహమ్మారిని కట్టడి చేయటం సాధ్యమేనని పలు మ్యాథెమాటికల్ మోడలింగ్ అధ్యయనాలు సూచిస్తున్నాయని కేంద్ర ఆరోగ్య శాఖ వెల్లడించింది. అయితే.. మనుషుల నుంచి మనుషులకు వ్యాప్తి చెందుతుండటం వల్ల వైరస్ కట్టడి చేసే కార్యక్రమాలు కచ్చితంగా విజయవంతమవుతాయని హామీ ఇవ్వలేమని అభిప్రాయపడింది. ఇప్పటి వరకు కరోనాకు చికిత్సకు సరైన ఔషదం, వ్యాక్సిన్ లేవని.. తీవ్ర అనారోగ్యానికి గురైన వారికి, ఆరోగ్య సిబ్బందికి క్రెమొప్రోఫిలాక్సిస్, హైడ్రాక్సీక్లోరోక్విన్లు సిఫార్సు చేస్తున్నట్లు స్పష్టం చేసింది.
కరోనా వైరస్ను మరింత వేగంగా వ్యాప్తి చేయగలిగే క్లస్టర్లు గుర్తించిన నేపథ్యంలో కంటెయిన్మెంట్ ప్రణాళికను రచించినట్లు ఓ ప్రకటన విడుదల చేసింది ఆరోగ్య శాఖ.
క్లస్టర్ కంటెయిన్మెంట్ వ్యూహం...
కేసులను త్వరితంగా గుర్తించటం, సంక్రమణ గొలుసును అడ్డుకోవటం, కొత్త ప్రాంతాలకు వ్యాప్తి చెందకుండా చూసుకోవటం ద్వారా నిర్ణీత ప్రాంతం పరిధిలోనే వైరస్ వ్యాప్తిని కట్టడి చేయటమే క్లస్టర్ కంటెయిన్మెంట్ వ్యూహం లక్ష్యం. జాతీయ స్థాయిలో సంస్థాగత యంత్రాంగాలు, అంతర్గత విభాగాల సమన్వయంతో పనిచేస్తాయని... జాతీయ విపత్తు నిర్వహణ కమిటీ (ఎన్సీఎంసీ), సెక్రెటరీస్ కమిటీ (సీఓఎస్)లు రంగంలోకి దిగుతాయని వెల్లడించింది. సమస్యలు గుర్తించిన ప్రాంతాల్లో ఆరోగ్య, ఆరోగ్యయేతర రంగాలతో ఎన్సీఎంసీ సమన్వయం చేస్తూ పనిచేస్తుందని పేర్కొంది.
"సమస్య తీవ్రంగా ఉన్న రాష్ట్రాలు కరోనా క్లస్టర్లలలో నియంత్రణ చర్యలకు రాష్ట్ర విపత్తు నిర్వహణ కమిటీని రంగంలోకి దించాలి. తీవ్రంగా ప్రభావితమైన రాష్ట్రాలతో ఎప్పటికప్పుడు సమావేశం నిర్వహిస్తాం. వైరస్ వ్యాప్తిని అడ్డుకునేందుకు భౌగోళిక క్వారంటైన్ అనుసరించాలి. ఇది వైరస్ వ్యాపించిన ఇతర ప్రాంతాల నుంచి ప్రయాణాలను పూర్తిగా నిషేధించాలని సూచిస్తోంది. పెద్ద మొత్తంగా కేసులు నమోదైన ప్రాంతాలు లేదా బహుళ క్లస్టర్లు ఉన్న ప్రాంతాలకు భౌగోళిక క్వారంటైన్ వర్తిస్తుంది. ఈ కంటెయిన్మెంట్ వ్యూహంలో భౌగోళిక క్వారంటైన్, భౌతిక దూరం పాటించటం, నిఘా పెంచటం, అనుమానాస్పద ప్రాంతాల్లో పరీక్షలు నిర్వహించటం, నిర్ధరణ అయిన వారిని నిర్బంధించటం, ప్రజలకు అవగాహన కల్పించటం వంటివి ఉన్నాయి."
– కేంద్ర ఆరోగ్య శాఖ.
క్లస్టర్ల సంఖ్య, పరిమాణం, భారత జనాభాలో వైరస్ ఏ విధంగా వ్యాప్తి చెందుతుంది.. వంటి విషయాలు భౌగోళిక క్వారంటైన్ ద్వారా వైరస్ వ్యాప్తి కట్టడి కార్యక్రమాల ఫలితాలను నిర్ధరిస్తాయని తెలిపింది కేంద్రం.
