'షహీన్​బాగ్ కాల్పుల నిందితుడు ఆమ్​ ఆద్మీ కార్యకర్త'

షహీన్​బాగ్​లో సీఏఏ నిరసనకారులపై కాల్పులకు పాల్పడిన కపిల్​.. ఆమ్​ ఆద్మీ పార్టీ సభ్యుడని దిల్లీ క్రైమ్​ బ్రాంచ్​ పోలీసులు తెలిపారు. ఈ విషయం తమ ప్రాథమిక దర్యాప్తులో తేలిందని స్పష్టం చేశారు. ఈ నెల 1న కపిల్​ నిరసనకారులపై రెండు రౌండ్ల కాల్పులు జరిపాడు.

ఈ నెల 1వ తేదీన జరిగిన షహీనబాగ్​ కాల్పులకు సంబంధించి సంచలన ప్రకటన చేశారు దిల్లీ క్రైమ్​ బ్రాంచ్​ పోలీసులు. సీఏఏకు వ్యతిరేకంగా ఆందోళనలు నిర్వహించిన వారిపై కాల్పులకు తెగబడ్డ కపిల్​ అనే వ్యక్తి... ఆమ్​ ఆద్మీ పార్టీ సభ్యుడని తెలిపారు. కపిల్​.. అతడి తండ్రి ఏడాది క్రితమే పార్టీలో చేరినట్టు ప్రాథమిక దర్యాప్తులో తేలిందని పేర్కొన్నారు.

కాల్పుల ఘటనపై దర్యాప్తు ముమ్మరం చేసిన పోలీసులు.. ఇందులో భాగంగా కపిల్​ ఫోన్​లో ఉన్న ఫొటోల ఆధారంగా ఈ విషయాన్ని నిర్ధరించినట్టు స్పష్టం చేశారు. కపిల్​ను రెండు రోజుల రిమాండ్​కు తరలించినట్టు క్రైమ్​ బ్రాంచ్​ డీసీపీ రాజేశ్​ దియో​ తెలిపారు.

"ఈ ఘటనపై సమగ్ర విచారణ జరిపాం. కపిల్​ను, అతడి సన్నిహితుడిని ట్రాక్​ చేశాం. కాల్పులకు పాల్పడిన రోజు.. కపిల్​ ఫోన్​ను ట్రాక్​ చేశాం. కానీ అతడిని అదుపులోకి తీసుకున్న తర్వాత... కపిల్​ వద్ద సెల్​ఫోన్​ లేదని తెలుసుకున్నాం. కపిల్​కు సంబంధించిన ప్రాంతాల్లో రైడ్​లు నిర్వహించి క్రైమ్​ బ్రాంచ్​ అతడి చరవాణిని సంపాదించింది. ఫోన్​ ఆధారంగా దర్యాప్తు చేపట్టాం. కానీ అందులోని ఫొటోలు తొలగించారని గుర్తించారం. సాంకేతిక నిపుణుల సాయంతో ఫొటోలను సంపాదించాం. ఆమ్​ ఆద్మీతో సంబంధాలున్నట్టు గుర్తించాం. 2019 జనవరి-ఫిబ్రవరి సమయంలో తన తండ్రితో కలిసి ఆప్​లో చేరినట్టు కపిల్​ అంగీకరించాడు."
-- రాజేశ్​ దియో, క్రైమ్​ బ్రాంచ్​ డీసీపీ.

ఇదీ జరిగింది...

కొన్నిరోజులుగా సీఏఏకు వ్యతిరేకంగా ఆందోళనలు నిర్వహిస్తున్న దిల్లీ షహీన్​బాగ్ ప్రాంతంలో ఈ నెల 1న ఓ వ్యక్తి తుపాకీతో రెండు రౌండ్లు గాల్లోకి కాల్పులు జరిపాడు. సాయంత్రం 5గంటల సమయంలో జరిగిన ఈ ఘటనలో ఎవరూ గాయపడలేదు. వెంటనే పోలీసులు కాల్పులు జరిపిన వ్యక్తిని అదుపులోకి తీసుకున్నారు.

కాల్పుల జరిపిన వ్యక్తిని పోలీసులు ఉత్తరప్రదేశ్​కు చెందిన కపిల్​ గుజ్జర్​గా గుర్తించారు. షహీన్​బాగ్​లో నిరసన తెలుపుతున్న వేదికకు 250మీటర్ల దూరంలో ఉండి కపిల్​ కాల్పులు జరిపినట్లు ప్రత్యక్ష సాక్షులు తెలిపారు.

కాల్పులు జరుపుతున్న సమయంలో కపిల్​ ' దేశంలో హిందువులు మాత్రమే మంచి చేస్తారు. మరెవరూ చేయరు. హిందూ దేశం జిందాబాద్​' అని నినాదాలు చేసినట్లు స్థానికులు చెప్పారు. షహీన్ బాగ్ వేదిక వద్ద కాల్పులను నిరసిస్తూ మహిళలు మానవహారం నిర్వహించారు.