దేశవ్యాప్తంగా కరోనా వైరస్ మహమ్మారి అంతకంతకూ విస్తరిస్తోంది. ఇదే సమయంలో పంటల మీద పడి టన్నుల కొద్దీ ఆహారాన్ని నాశనం చేసే మిడతల దండు స్వైర విహారం చేస్తోంది. ఇప్పటికే రాజస్థాన్, ఉత్తర్ప్రదేశ్, మధ్యప్రదేశ్, మహారాష్ట్రలోకి ప్రవేశించిన ఈ కీటకాల గుంపు మరిన్ని రాష్ట్రాలకు విస్తరిస్తుందని నిపుణులు హెచ్చరిస్తున్నారు.
వీఎన్ఏయూ మార్గదర్శకాలు..
ఇంతటి విధ్వంసం సృష్టించే మిడతలను ఎదుర్కోవటానికి మహారాష్ట్ర పర్భణిలోని వసంత్రావ్ నాయక్ వ్యవసాయ విశ్వవిద్యాలయం పలు పద్ధతులను రైతులకు సూచించింది. ఈ మేరకు వ్యవసాయ ఎంటమాలజీ విభాగం కొన్ని మార్గదర్శకాలు విడుదల చేసింది.
- ఆడ మిడతలు తేమతో కూడిన ఇసుక భూమిలో 50-100 గుడ్లు పెడతాయి. ఈ గుడ్లు పొదిగే కాలం వాతావరణంపై ఆధారపడి ఉంటుంది. 2 నుంచి 4 వారాలు పట్టొచ్చు. లార్వా బయటకు వచ్చినప్పుడు అవి వెంటనే ఎగరలేవు. ఈ గుడ్లను గుంపులుగా ఉన్నప్పుడే పగలగొట్టాలి.
- 60 సెం.మీ వెడల్పు, 75 సెం.మీ లోతుతో కందకాలు తవ్వాలి. దండులోని చిన్న మిడతలను వీటి ద్వారా పట్టుకోవచ్చు. లార్వా నుంచి బయటకు వచ్చిన తర్వాతే మిడతలు గుంపులో చేరుతాయి. అప్పుడే ఆకులు, కొమ్మలు, పువ్వులు, విత్తనాలను తింటాయి.
- పెద్ద మిడతలు వాటి బరువుకు సమానంగా తింటాయి. గంటకు 12 నుంచి 16 కిలోమీటర్ల వేగంతో వెళతాయి. చదరపు కిలోమీటర్ వైశాల్యంలో ఉండే మిడతల దండు 3 వేల క్వింటాళ్ల ఆహారాన్ని తింటాయి.
- అవి విశ్రాంతి తీసుకునే రాత్రివేళల్లో పొగ ద్వారా వీటిని మట్టుబెట్టవచ్చు. ఈ సమయంలో పంటపొలాలకు నిప్పు అంటుకోకుండా రైతులు జాగ్రత్త పడాలి.
- హెక్టారుకు 2.5 లీటర్ల వేప నూనెను పిచికారీ చేయాలి. ఇది మిడతల దండును నియంత్రించడంలో సమర్థంగా పనిచేస్తుంది.
ఇదీ చూడండి:దండుపై దండయాత్ర- యూకే నుంచి ప్రత్యేక స్ప్రేయర్లు
