వేతన కోడ్​ బిల్లుకు లోక్​సభ ఆమోదం

కార్మికులకు కనీస జీతాల కల్పన కోసం రూపొందించిన వేతన కోడ్​ బిల్లు-2019కు లోక్​సభ ఆమోదం తెలిపింది.

వేతన కోడ్​-2019 బిల్లుకు లోక్​సభ ఆమోదం తెలిపింది. ప్రతి కార్మికుడికి కనీసం వేతనం, జీతాలు చెల్లించటంలో జాప్యం వంటి సమస్యలకు పరిష్కంచేందుకు రూపొందించిన వేతన కోడ్ బిల్లు-2019 దిగువసభలో నెగ్గింది.

వేతనాలు, బోనస్‌ వంటి కార్మికులకు చెందిన చట్టాల సవరణకు ఈ బిల్లు అవకాశం కల్పిస్తుంది. బిల్లుపై చర్చలో భాగంగా కేంద్ర కార్మిక శాఖ మంత్రి సంతోష్ కుమార్​ గంగ్వార్​ మాట్లాడారు.

"ఈ బిల్లుతో 50 కోట్ల మంది ఉద్యోగులకు లబ్ధి చేకూరుతుంది. కనీస వేతన చట్టం, వేతనాల చెల్లింపుల చట్టం, బోనస్ చెల్లింపుల చ్టటం, సమాన వేతన చట్టాన్ని కలిపి ఈ నూతన బిల్లు రూపొందించాం. కేంద్ర, రాష్ట్ర ప్రభుత్వాలు కలిసి ఈ కనీస వేతన పథకాన్ని అమలుచేస్తాం."

-సంతోష్ కుమార్​ గంగ్వార్, కేంద్ర కార్మిక శాఖ మంత్రి

వేతన బిల్లుకు సంబంధించి స్థాయీ సంఘం చేసిన 24 సిఫార్సులలో పదిహేడింటిని కేంద్రం ఆమోదించింది. ఈ బిల్లు ప్రకారం ఉద్యోగ సంఘాలు, సంస్థలు, రాష్ట్ర ప్రభుత్వ ప్రతినిధులతో కూడిన కమిటీ కనీస వేతనాన్ని నిర్ధరిస్తాయని తెలిపారు గంగ్వార్‌. ఫలితంగా కనీస వేతనం కార్మికుల హక్కుగా మారుతుందని చెప్పారు.

ఇదీ చూడండి: 'ముమ్మారు తలాక్' బిల్లుకు పార్లమెంటు ఆమోదం