చైనా మరోసారి తన వక్రబుద్ధిని ప్రదర్శించింది. తూర్పు లద్దాఖ్‌లోని వాస్తవాధీన రేఖ వెంబడి సరిహద్దుల్లో కవ్వింపు చర్యలకు పాల్పడరాదంటూనే ఇరుదేశాల మధ్య కుదిరిన దౌత్యపరమైన ఒప్పందాన్ని ఉల్లంఘించింది.
ఆగస్టు 29, 30 తేదీల్లో రాత్రి వేళల్లో యథాతథ స్థితిని దెబ్బతీసేందుకు రెచ్చగొట్టేలా డ్రాగన్ బలగాలు చర్యలు చేపట్టాయని భారత సైన్యం తెలిపింది. వాస్తవాధీన రేఖ వెంట సైనిక కార్యకలాపాల్ని మళ్లీ ప్రారంభించినట్లు తెలిపింది.
అయితే చైనా కుట్రను దీటుగా ఎదుర్కొనేందుకు ప్యాంగాంగ్ దక్షిణ ప్రాంతంలో పటిష్ఠ చర్యలు తీసుకున్నట్లు భారత సైన్యం ప్రజా సంబంధాల అధికారి కల్నల్ అమన్‌ ఆనంద్‌ తెలిపారు. చర్చల ద్వారా శాంతిని కాపాడేందుకు కట్టుబడి ఉన్నామని.. అదే సమయంలో ప్రాదేశిక సమగ్రతను కాపాడటం తమ కర్తవ్యమని సైన్యం స్పష్టం చేసింది. తాజా ఘటన నేపథ్యంలో సరిహద్దులో ఉన్న చుశుల్లో కమాండర్ స్థాయి అధికారులు సమావేశమై సమస్య పరిష్కారంపై చర్చిస్తున్నారు.
ఆ తర్వాత ఇదే..
జూన్‌ 15 గల్వాన్ లోయ ఘర్షణల తర్వాత చైనా దుందుడుకు చర్యల్లో ఇదే పెద్ద ఘటన అని భారత సైన్యం అభిప్రాయపడింది. గల్వాన్ లోయలో జరిగిన ఘర్షణల్లో 20 మంది భారత జవాన్లు మరణించగా.. చైనా జవాన్లు కూడా పెద్ద సంఖ్యలోనే ప్రాణాలు కోల్పోయినట్టు అమెరికా నిఘావర్గాలు వెల్లడించాయి. అయితే చైనా ఇప్పటివరకు ఆ విషయాన్ని ధ్రువీకరించలేదు. కానీ, ఇటీవలే చైనాలో ఓ జవాను సమాధిపై గల్వాన్ లోయలో చనిపోయిన అమరవీరుడంటూ మాండరిన్‌ భాషలో ఉన్న ఫొటో సోషల్ మీడియాలో వైరల్‌ అయింది.
రాజకీయ రగడ..
చైనా తాజా దూకుడుపై అధికార విపక్షాల మధ్య మాటల యుద్ధం తలెత్తింది. దేశ సార్వభౌమత్వంపై దాడి జరిగిందని, చైనా సైన్యం ప్రతీరోజు భారత్లోకి చొరబాటు ప్రయత్నాలు చేస్తోందని కాంగ్రెస్ తీవ్ర స్థాయిలో విమర్శలు చేసింది. లద్దాఖ్ ఘర్షణలు ఉత్తరాఖండ్లోని లిపులేఖ్ వరకు వ్యాపించాయని ఆరోపించింది.