'శస్త్ర​ చికిత్స చేశాకే నోటి నిండా వెంట్రుకలు పెరిగాయి!​'

తినేటప్పుడు కంచంలో ఒక్క వెంట్రుక కనిపిస్తేనే.. అన్నం మింగుడు పడదు. అలాంటిది.. కేరళకు చెందిన స్టీఫెన్ నోటి నిండా వెంట్రుకలు పెరిగిపోయాయి. విపరీతంగా పెరిగిన అవాంఛిత రోమాల కారణంగా తీవ్ర ఇబ్బందులు ఎదుర్కొంటున్నాడు స్టీఫెన్​. కనీసం నీళ్లు కూడా తాగలేని దీన స్థితిలో కాలం వెళ్లదీస్తున్నాడు. కేన్సర్​ వచ్చిందని వైద్యుల దగ్గరికెళితే నోట్లో రోమాలు పెరిగేలా శస్త్ర చికిత్స చేశారని లబోదిబోమంటున్నాడు.

సాధారణంగా కేశాలు తలపై ఉంటే సౌందర్యాన్ని పెంచుతాయి.. శరీరం నిండా ఉంటే చికాకును తెప్పిస్తాయి. కానీ, కేరళ త్రివేండ్రంలో స్టీఫెన్​ నోటిలో పెరిగిన అవాంఛిత రోమాలు అతడిని భరించలేని వేదనకు గురిచేస్తున్నాయి.

వైద్యుల నిర్వాకం...

కొన్ని రోజుల క్రితం స్టీఫెన్​కు నోటి కేన్సర్​ సోకింది. చికిత్స కోసం త్రివేండ్రంలోని ఆర్​సీసీ ఆసుపత్రికి వెళ్లాడు. శస్త్రచికిత్స ద్వారా నోటిలోని ​కేన్సర్ భాగాలను తొలగించారు వైద్యులు. ఆ భాగంలో తొడ భాగం నుంచి తీసిన చర్మాన్ని అతికిస్తామని చెప్పి.. స్టీఫెన్​ గడ్డం (దవడ) భాగం నుంచి తీసిన చర్మాన్ని అంటుకట్టారు. ఆ తర్వాతే నోటిలో రోమాలు పెరిగే ఇబ్బంది మొదలైందని వాపోతున్నాడు స్టీఫెన్.

డాక్టర్​ గారి 'బార్బర్'​ సలహా

కొబ్బరి చెట్లెక్కే కూలీ పనికి వెళితే గానీ స్టీఫెన్​ బతుకు బండి నడవదు. కానీ, ఈ రోమాల కారణంగా అన్నం తినక, కనీసం నీరు తాగలేకపోవడం వల్ల చెట్లెక్కేందుకు శక్తి సరిపోవట్లేదు. అంతేకాదు.. నిత్యం నోట్లో అడ్డుగా తగులుతూ తీవ్ర ఇబ్బందులకు గురి చేస్తున్నాయి రోమాలు.

ఇదేంటయ్యా అంటూ శస్త్ర చికిత్స చేసిన వైద్యుల దగ్గరికెళ్లాడు స్టీఫెన్​. 'నోట్లో వెంట్రుకలు పెరిగితే కత్తిరించుకో లేదా క్షురకుడి దగ్గరికెళ్లి క్షవరం చేయించుకో' అంటూ ఓ డాక్టర్ ఇచ్చిన సలహా విని గుండెలు పగిలేలా ఏడ్చాడు స్టీఫెన్​.

వైద్యుల నిర్లక్ష్యంతో తీవ్ర వేదనకు గురయ్యాడు. వింత సమస్యకు పరిష్కారం తెలియక అయోమయంలో మునిగిపోయాడు.

ఇదీ చదవండి:పెళ్లి నుంచి పారిపోయిన వరుడు.. కారణమిదే!