రాజీనామాలను పరిశీలించాకే నిర్ణయం: కర్ణాటక స్పీకర్

కర్ణాటక అసంతృప్త ఎమ్మెల్యేలు సరైన ఫార్మాట్​లో రాజీనామాలు సమర్పించారని స్పీకర్ రమేశ్​ కుమార్ తెలిపారు. వీటిని సోమవారం పరిశీలించి నిర్ణయం తీసుకుంటానని చెప్పారు. 10 మంది శాసన సభ్యులతో భేటీ అనంతరం మీడియా సమావేశం నిర్వహించారు రమేశ్​.

కర్ణాటక విధాన సౌధలో అసంతృప్త ఎమ్మెల్యేలతో భేటీ అనంతరం మీడియా సమావేశం నిర్వహించారు స్పీకర్ రమేశ్ కుమార్. శాసన సభ్యులు సరైన ఫార్మాట్​లోనే రాజీనామాలు సమర్పించారని తెలిపారు. రాజీనామాలు స్వచ్ఛందంగా, సక్రమంగా ఉన్నాయో లేదో పరిశీలిస్తానన్నారు. గతంలో ఇచ్చిన వాటిలో 8 రాజీనామాలు సరైన ఫార్మాట్‌లో లేవని తెలిపారు రమేశ్. రేపటిలోగా ఎమ్మెల్యేల రాజీనామాపై నిర్ణయం తీసుకోవాలన్న సుప్రీంకోర్టు ఆదేశాలపై వీడియో రూపంలో సమాధానం పంపిస్తానని తెలిపారు.

సుప్రీంకోర్టు ఆదేశాల మేరకు ఈరోజు సాయంత్రం స్పీకర్​ను కలిసేందుకు ముంబయి నుంచి ప్రత్యేక విమానంలో బెంగళూరు చేరుకున్న 10 మంది అసంతృప్త ఎమ్మెల్యేలు కర్ణాటక విధాన సౌధలో స్పీకర్​ను కలిశారు.