కన్నడ అసెంబ్లీ తదుపరి స్పీకర్​గా కగేరీ..!

కర్ణాటక విధానసభ నూతన సభాపతిగా భాజపా సీనియర్​ ఎమ్మెల్యే.. విశ్వేశ్వర్​ హెగ్డే కగేరీ ఎన్నిక లాంఛనం కానుంది. నిర్ణీత గడువులోగా ఆయన ఒక్కరే నామినేషన్​ దాఖలు చేశారు. బుధవారం అసెంబ్లీ సమావేశాల్లో ఈయన ఎంపికపై అధికారికంగా ప్రకటించే అవకాశముంది.

భాజపా సీనియర్​ నేత, ఎమ్మెల్యే విశ్వేశ్వర్​ హెగ్డే కగేరీ.. కర్ణాటక అసెంబ్లీ తదుపరి స్పీకర్​గా బాధ్యతలు చేపట్టే అవకాశం ఉంది. మంగళవారం మధ్యాహ్నం నిర్ణీత గడువు 12 గంటలలోగా ఆయన ఒక్కరే నామినేషన్​ పత్రాలు సమర్పించారు. ఫలితంగా.. ఈయన ఎన్నికపై అధికారికంగా రేపు సభలో ప్రకటించనున్నట్లు తెలుస్తోంది. ఈ కార్యక్రమానికి సీఎం యడియూరప్ప సహా పార్టీ సీనియర్​ నేతలు హాజరయ్యారు.

యడియూరప్ప సర్కారు విశ్వాస పరీక్షలో నెగ్గిన అనంతరం.. సభాపతి పదవికి రాజీనామా ప్రకటించారు రమేశ్​ కుమార్​. అనంతరం.. స్పీకర్​ పోస్టుకు నామినేషన్లు కోరారు అసెంబ్లీ కార్యదర్శి. భాజపాకు మెజార్టీ ఉన్నందున.. తమ అభ్యర్థిని ప్రకటించలేదని స్పష్టం చేశాయి కాంగ్రెస్, జేడీఎస్​లు​.

''ఇప్పటివరకు విశ్వేశ్వర్​ హెగ్డే కగేరీ నామినేషన్​ ఒక్కటే దాఖలైంది.''

-విశాలాక్షి, అసెంబ్లీ కార్యదర్శి

94 నుంచి వరుస విజయాలు..

అఖిల భారత విద్యార్థి పరిషత్​(ఏబీవీపీ)లో కగేరీ క్రియాశీలకంగా పనిచేశారు. అంకోలా స్థానంలో 1994 నుంచి వరుసగా అసెంబ్లీకి ఎన్నికవుతున్నారు. గతంలో విద్యాశాఖ మంత్రిగానూ సేవలందించారు.

అసమ్మతి ఎమ్మెల్యేల రాజీనామాల అనంతరం.. ఎన్నో నాటకీయ పరిణామాల నడుమ విశ్వాస పరీక్షలో ఓడి కాంగ్రెస్​-జేడీఎస్​ సంకీర్ణ ప్రభుత్వం కూలిపోయింది. ఫలితంగా.. 14 నెలల కుమారస్వామి పాలనకు తెరపడింది.

తదనంతరం యడియూరప్ప ప్రమాణ స్వీకారం, విశ్వాస పరీక్షలో గెలుపు, స్పీకర్​ రాజీనామా చకచకా జరిగిపోయాయి.