భారత్​లో ఐసిస్ ఉగ్రసంస్థ​ కొత్త బ్రాంచ్..!

ఇస్లామిక్​ స్టేట్​ ఉగ్రవాద సంస్థ భారత్​లో నూతన శాఖ ఏర్పాటు చేసినట్లు ప్రకటించింది. కశ్మీర్​లో మే 10న జరిగిన ఎన్​కౌంటర్​లో పాల్గొన్నది తమ సభ్యులేనని చెప్పింది. ఐసిస్​ ప్రకటనను తోసిపుచ్చారు జమ్ముకశ్మీర్​ సీనియర్​ పోలీసు అధికారి ఒకరు.

భారత్​లో ఉనికి చాటుకునేందుకు ఇస్లామిక్​ స్టేట్​ ఉగ్రవాద సంస్థ ప్రయత్నాలు చేపట్టింది. భారత్​లో నూతన శాఖను ఏర్పాటు చేసినట్లు ప్రకటించింది. కొత్త బ్రాంచ్​కు అరబిక్​ భాషలో 'విలాయా​ ఆఫ్​ హిందు' ( భారత రాష్ట్రం)గా నామకరణం చేసినట్లు అమాక్​ న్యూస్​ ఏజెన్సీ ద్వారా వెల్లడించింది ఐసిస్​. అయితే ఈ నూతన శాఖ భౌగోళిక పరిధులపై స్పష్టత ఇవ్వలేదు.

కొత్త శాఖకు సంబంధించి ఈనెల 10నే టెలిగ్రామ్​ యాప్​ ద్వారా ఐసిస్​ ఓ సందేశం పంపింది. మెషీన్​ గన్లతో కూడిన ఐసిస్​ ఉగ్రవాదులు కశ్మీర్​ షోపియాన్​ జిల్లా అమ్షీపురాలో భద్రతా సిబ్బందితో పోరాడారని ఆ ప్రకటనలో పేర్కొంది. అయితే ఈ ఘటన ఎప్పుడు జరిగిందో ఐసిస్​ స్పష్టత ఇవ్వలేదు.

మీడియా కథనాల ప్రకారం మే 10న షోపియాన్​ జిల్లాలో జరిగిన ఎన్​కౌంటర్​లో ఒక ఉగ్రవాది హతమయ్యాడు.

పూర్తిగా అసత్యం...

భారత్​లో కొత్త శాఖ ఏర్పాటుపై ఐసిస్​ ప్రకటనను జమ్ముకశ్మీర్​ సీనియర్​ పోలీస్​ అధికారు ఒకరు తోసిపుచ్చారు. తప్పుడు వార్తగా కొట్టిపారేశారు.

కొత్తేం కాదు...

పశ్చిమాసియాలో దాదాపు ఆధిపత్యం కోల్పోయింది ఐసిస్​. అందుకే ప్రపంచంలోని ఇతర ప్రాంతాల్లో పట్టు సాధిస్తున్నామని సంకేతాలిచ్చేందుకు ఐసిస్​ అధినేత అబు బకర్​ అల్​ బాగ్దాదీ ఎప్పటినుంచో ఇలాంటి కొత్త శాఖ ప్రకటనల వ్యూహం అమలు చేస్తున్నాడు.

2017 నవంబర్​ నుంచి భారత్​లో జరిగిన అనేక దాడులకు బాధ్యత ప్రకటించుకుంది ఐసిస్