'అయోధ్య, కశ్మీర్​లో దాడులకు ఉగ్రకుట్ర'

అయోధ్య రామాలయం భూమి పూజ, స్వతంత్ర వేడుకలు లక్ష్యంగా ఉగ్రవాదులు అల్లర్లు సృష్టించేందుకు అవకాశం ఉందని హెచ్చరించింది నిఘా విభాగం. ఇప్పటికే కొందరు ముష్కలు దేశంలోకి చొరబడ్డట్లు తెలిపింది.

కశ్మీర్​లో మే నెలలో రంజాన్ సందర్భంగా దాడులకు విఫలయత్నం చేసిన ఉగ్రవాదులు.. దేశంలో అల్లర్లకు మరోమారు ప్రయత్నిస్తున్నట్లు నిఘా వర్గాలు వెల్లడించాయి. ఆర్టికల్ 370 రద్దు చేసి ఏడాది కాలం పూర్తయిన సందర్భంగా ఆగస్టు 5న అయోధ్య రామ మందిర భూమి పూజ, జమ్ముకశ్మీర్​ లక్ష్యంగా దాడులు చేయాలని ప్రణాళికలు రచిస్తున్నట్లు సమాచారం అందినట్లు స్పష్టం చేశాయి. స్వతంత్ర వేడుకలకూ ఉగ్రముప్పు పొంచి ఉన్నట్లు నిఘావర్గాలు చెబుతున్నాయి. పాకిస్థాన్ సైన్యం ద్వారా అఫ్గానిస్థాన్​లోని జలాలాబాద్​లో శిక్షణ పొందిన ముష్కరులు ఇందుకు సిద్ధమయ్యారని తెలుస్తోంది.

నిఘా వర్గాల ద్వారా అందిన సమాచారం మేరకు దిల్లీ, జమ్ముకశ్మీర్, అయోధ్యలో భద్రతను పటిష్ఠం చేశారు.

"పాకిస్థాన్ సైన్యం ద్వారా శిక్షణ పొందిన ఉగ్రవాదులు.. రంజాన్ ముగిసిన అనంతరం మే 26 నుంచి 29 మధ్య జమ్ముకశ్మీర్​లో దాడులకు విఫలయత్నం చేశారు. ఈ నేపథ్యంలో భద్రతను కట్టుదిట్టం చేయాలి."

-నిఘా వర్గాల హెచ్చరిక

భారత్​లో ఇప్పటికే ముష్కరులు..

నియంత్రణ రేఖ వెంబడి 20 నుంచి 25 మంది ఉగ్రవాదులను ఇప్పటికే పాక్ సైన్యం పంపించిందని.. భారత్- నేపాల్ సరిహద్దు ద్వారా ఇలాంటి 5-6 బృందాలు భారత్​లోకి చొరబడి ఉంటాయని అంచనా వేసింది నిఘా విభాగం. ఈ నేపథ్యంలోనే అయోధ్య భూమిపూజ, స్వతంత్ర వేడుకలకు కట్టుదిట్టమైన భద్రతా ఏర్పాట్లు చేయాలని సంబంధిత అధికారులకు సూచించింది.

ఇదీ చూడండి:అయోధ్య రామ మందిర పూజారి, పోలీసులకు కరోనా