అమెరికాలో తెలుగు విద్యార్థికి 12 నెలల జైలు శిక్ష

అమెరికాలోని ఓ కళాశాలలో కంప్యూటర్​ పరికరాలను ఉద్దేశపూర్వకంగా ధ్వంసం చేసినట్టు తేలిన కేసులో తెలుగు విద్యార్థికి 12 నెలల జైలు శిక్ష పడింది. ఆకుతోట విశ్వనాథ్​కు జైలు శిక్షతో పాటు సుమారు రూ.42 లక్షలు నష్ట పరిహారం విధించింది స్థానిక కోర్టు.

అమెరికాలోని ఓ తెలుగు విద్యార్థికి అక్కడి న్యాయస్థానం 12 నెలల జైలు శిక్ష విధించింది. 27 ఏళ్ల విశ్వనాథ్​ ఆకుతోట.. ఓ కళాశాలలో ఉద్దేశపూర్వకంగానే కంప్యూటర్​ పరికరాలను ధ్వంసం చేసినట్టు తేలింది. ఈ కేసులో న్యూయార్క్​ ఉత్తర జిల్లా న్యాయస్థానం తీర్పు ఇచ్చింది. జైలు శిక్షతోపాటు 58,471 డాలర్లు (సుమారు రూ.42 లక్షలు) నష్ట పరిహారం చెల్లించాలని ఆదేశించింది.

అల్బానీ నగరంలోని సెయింట్​ రోస్​ కళాశాలలో ఫిబ్రవరి 14న 'యూఎస్​బీ కిల్లర్​' అనే పరికరాన్ని 66 కంప్యూటర్లకు, మరికొన్ని మానిటర్లకు అమర్చినట్టు విశ్వనాథ్​ అంగీకరించాడు. ఆ పరికరం వల్ల కంప్యూటర్లలోని కెపాసిటర్లు అసాధారణ రీతిలో ఛార్జ్​-డిశ్చార్జ్​ అయ్యి... యూఎస్​బీ పోర్ట్​ దెబ్బతింది. వెంటనే విద్యుత్​ వ్యవస్థ ధ్వంసమైంది.

భారతీయుడైన విశ్వనాథ్​.. విద్యార్థి వీసాతో అమెరికాలో నివసిస్తున్నాడు. ఫిబ్రవరి 22న ఉత్తర కరోలినా పోలీసులు అతడ్ని అదుపులోకి తీసుకున్నారు.

ఇదీ చూడండి:- హాంకాంగ్​​ సరిహద్దులో చైనా దళాల మోహరింపు!