వాయుసేన అమ్ములపొదిలో 'అపాచీ గార్డియన్​'

భారత వాయుసేనలోకి మరో అత్యాధునిక హెలికాప్టర్​ చేరింది. ఒప్పందంలో భాగంగా తొలి అపాచీ గార్డియన్​ చాపర్​ను భారత్​కు అందించింది అమెరికా. 22 హెలికాప్టర్ల కొనుగోలుకు అగ్రరాజ్యంతో 2015లో బిలియన్​ డాలర్ల ఒప్పందం చేసుకుంది భారత వాయుసేన.

భారత వాయుసేన అమ్ములపొదిలోకి మరో అస్త్రం చేరింది. 2015లో అమెరికాతో కుదిరిన ఒప్పందంలో భాగంగా తొలి అపాచీ గార్డియన్​ హెలికాప్టర్​ను శుక్రవారం భారత్​కు అందించింది అగ్రరాజ్యం. ఈ అత్యాధునిక హెలికాప్టర్లు వాయుసేనను మరింత బలోపేతం చేస్తాయని అధికారులు తెలిపారు.

భవిష్యత్తు అవసరాలకు అనుగుణంగా, పర్వత ప్రాంతాల సవాళ్లను సమర్థంగా ఎదుర్కొంటూ శత్రువులపై అనూహ్య రీతిలో దాడి చేయగలిగే విధంగా అపాచీ గార్డియన్​ను రూపొందించారు. ఇప్పటికే ఈ ఏహెచ్​- 64 అపాచీ హెలికాప్టర్లు అమెరికా సైన్యానికి విశేష సేవలు అందిస్తున్నాయి.

22 అపాచీ చాపర్ల కొనుగోలుకు 2015, సెప్టెంబర్​లో అగ్రరాజ్యంతో భారత వాయుసేన బిలియన్​ డాలర్ల ఒప్పందం కుదుర్చుకుంది.

"ఇతర దళాలతో కలిసి పనిచేసేందుకు అపాచీ గార్డియన్​ ఎంతో ఉపయోగపడుతుంది. ఈ హెలికాప్టర్​ కోసమే కొంతమంది పైలట్లు, సిబ్బంది ప్రత్యేకంగా అమెరికా సైన్య శిబిరంలో శిక్షణ పొందారు. "
---- భారత వాయుసేన.

ఇదీ చూడండి:'మోదీ సిద్ధాంతం విభజించి.. పాలించడం'