దేశాన్ని చెత్తనుంచి విముక్తి చేయడంలో భాగంగా ప్రచార కార్యక్రమాన్ని ప్రధానమంత్రి నరేంద్ర మోదీ ప్రారంభించడంపై కాంగ్రెస్ నేత రాహుల్ గాంధీ విరుచుకుపడ్డారు. దేశాన్ని చెత్త నుంచి విముక్తి చేసే ముందు రోజురోజుకూ పెరిగిపోతున్న అబద్ధాల వ్యర్థాలను శుభ్రపరచాలని ఎద్దేవా చేశారు. ముందుగా.. చైనా చొరబాట్లపై స్పందించి సత్యాగ్రహాన్ని ప్రారంభించాలని విమర్శించారు.
స్వచ్ఛ భారత్ అంశంపై వారం రోజుల ప్రచార కార్యక్రమాన్ని శనివారం ప్రారంభించారు మోదీ. ఇందులో పాల్గొని చెత్త విముక్త భారత్ కోసం ప్రతిజ్ఞ చేయాలని ప్రజలకు విజ్ఞప్తి చేశారు. దీనికి సంబంధించి ప్రధాని కార్యాలయం చేసిన ట్వీట్పై రాహుల్ స్పందించారు.
"మనం మరో అడుగు ముందుకు వేసి దేశంలో రోజురోజుకు పెరిగిపోతున్న అబద్ధాల చెత్తను శుభ్రం చేయాలి. చైనా దురాక్రమణపై ప్రధాని నిజాలు చెప్పి సత్యాగ్రహాన్ని ప్రారంభిస్తారా?."
-రాహుల్ గాంధీ, కాంగ్రెస్ నేత