వైద్యుల దినోత్సవాన్ని పురస్కరించుకుని ఆరోగ్య సిబ్బందికి సంఘీభావం ప్రకటించారు కాంగ్రెస్ అగ్రనేత రాహుల్ గాంధీ. కరోనా నుంచి ప్రజలను కాపాడేందుకు తమ ప్రాణాలను పణంగా పెట్టారని కొనియాడారు. ఈ మేరకు న్యూజిలాండ్, ఆస్ట్రేలియా, బ్రిటన్, భారత్లో పనిచేస్తోన్న నలుగురు భారతీయ నర్సులతో 30 నిమిషాలపాటు మాట్లాడారు రాహుల్.
ఈ సంభాషణలో కరోనా వాతావరణంలో వారి కుటుంబ జీవితాలపై పడే ప్రభావం గురించి చర్చించారు. వారి అనుభవాలు విన్న ఆయన.. ఈ సంక్షోభ సమయంలో ప్రజలు అండగా ఉంటారని భరోసా ఇచ్చారు.
వైద్య నిపుణులతోనూ చర్చ..
అంతకుముందు వైద్య రంగ నిపుణులతోనూ రాహుల్ చర్చించారు. దిల్లీలోని చాలా ఆసుపత్రుల్లో పరీక్షలు నిర్వహించటం లేదని ఆరోపించారు. ఫలితంగా వారికి చికిత్స చేయటం సాధ్యం కావట్లేదని ఓ వైద్యుడు తనతో చెప్పినట్లు రాహుల్ వెల్లడించారు. చాలా మంది వైద్యులు కరోనా బారిన పడుతున్నారని కృష్ణన్ అనే మరో నిపుణుడు ఆవేదన వ్యక్తం చేశారని ఆయన చెప్పారు.
"ప్రభుత్వాలు కరోనా మహమ్మారిని ప్రమాదకరం కాదనే విధంగా అవగాహన కల్పించడానికి ప్రయత్నిస్తున్నారు. కానీ మనం సవాళ్లను ఎదుర్కోవలసి ఉంటుందని నేను నమ్ముతున్నాను. అందువల్ల మనం వాస్తవాలను అంగీకరించాలి. ఈ సమస్యను కచ్చితంగా పోరాడాలి."
- రాహుల్ గాంధీ, కాంగ్రెస్ అగ్రనేత