పారిస్ ఒప్పందాన్ని అమలు పరిచే విధంగా కేంద్రం ప్రయత్నాలు ప్రారంభించింది. అపెక్స్ కమిటీ ఫర్ ఇంప్లిమెంటేషన్ ఆఫ్ పారిస్ అగ్రిమెంట్ పేరుతో ప్రత్యేక కమిటీని ఏర్పాటు చేస్తూ గెజిట్ నోటిఫికేషన్ విడుదల చేసింది అటవీ, పర్యావరణ మంత్రిత్వ శాఖ.
కమిటీ విధులు..
- దేశంలో కర్బన ఉద్గారాలు ఎక్కువగా వస్తున్న ప్రదేశాలను గుర్తించి వాటిని సాధారణ స్థితికి తీసుకువచ్చేందుకు చర్యలు చేపట్టాలి.
- అందుకు అవసరమైన నియమ నిబంధనలు, తప్పనిసరి చేయాల్సిన కార్యకలాపాలను అమలులోకి తీసుకువచ్చేందుకు కృషి చేయాలి.
- ప్రైవేటు సంస్థలనూ ఈ కార్యకలాపాల్లో భాగస్వాములను చేసేందుకు వారితో ద్వైపాక్షిక, త్రైపాక్షిక ఒప్పందాలు చేసుకొని జాతీయ దృక్పథంతో పనిచేసేలా చూడాలి.
- దేశవ్యాప్తంగా పర్యావరణ పరిరక్షణ చర్యలు ముమ్మరం చేయడం సహా సంస్థాగత, వ్యవస్థాగత సంస్కరణలు చేపట్టాలి.
17 మందితో కమిటీ..
2021 నుంచి పారిస్ ఓప్పందం అమలులోకి రానున్న నేపథ్యంలో అపెక్స్ కమిటీ ఏర్పాటు తప్పనిసరి అయింది. ఈ నేపథ్యంలోనే 17 మంది సీనియర్‌ అధికారులతో కమిటీని ఏర్పాటు చేశారు. కేంద్ర అటవీ, పర్యావరణ శాఖ కార్యదర్శి.. ఛైర్మన్‌గా వ్యవహరిస్తారు.ఆ శాఖ అదనపు కార్యదర్శి డిప్యూటీ ఛైర్మన్‌గా ఉంటారు.