'విగ్రహం కళ్లు తెరిచింది..! ఆలయం కిక్కిరిసింది'

కర్ణాటకలోని నల్లమ్మదేవి ఆలయంలో దేవత విగ్రహం కళ్లు తెరిచిందన్న వార్త కలకలం రేపింది. ఇది విన్న భక్తులు హుబ్బళ్లిలోని ఆలయానికి భారీ సంఖ్యలో తరలివెళ్తున్నారు. ఆలయానికి భక్తుల తాకిడి ఒక్కసారిగా పెరిగింది.

గణపతి పాలు తాగాడు, దేవతా విగ్రహాలు కళ్లు తెరిచాయన్న వార్తలు తరచూ వింటూనే ఉంటాం. ఈ విషయాలు విన్న భక్తులు వెంటనే ఆ ప్రాంతాలకు తరలి వెళ్తారు. తాజాగా ఇలాంటి ఘటనే కర్ణాటకలోని హుబ్బళ్లిలో జరిగింది. మంటూర్​ ప్రాంతంలోని నల్లమ్మదేవి ఆలయం భక్తులతో కిక్కిరిసిపోతోంది. ఆలయంలోని విగ్రహం కళ్లుతెరిచిందని వారి విశ్వాసం. ఈ ఘటనకు సంబంధించిన ఓ వీడియో ప్రస్తుతం సామాజిక మాధ్యమాల్లో వైరల్​గా మారింది.

దేవత విగ్రహానికి వెండితో తయారు చేసిన కళ్లు ఉండేవి. ఇటీవలే వాటిని గుర్తుతెలియని వ్యక్తులు దొంగలించారు. ఈ ఘటన అనంతరం దేవాలయాన్ని అర్చకులు మూసివేశారు. మంగళవారం సాయంత్రం ఆలయాన్ని తెరిచిన సిబ్బంది ఒక్కసారిగా ఆశ్చర్యానికి గురయ్యారు. కళ్లతో ఉన్న నల్లమ్మదేవి విగ్రహం వారికి దర్శనమివ్వడమే ఇందుకు కారణం. ఇది తెలుసుకున్న భక్తులు... ఆలయానికి పోటెత్తుతున్నారు. అమ్మవారికి ప్రత్యేక పూజలు చేస్తున్నారు.

రైల్వేశాఖకు చెందిన భూమిలో ఈ నల్లమ్మదేవి ఆలయం ఉంది. ఈ గుడిని అక్కడి తరలించడానికి అధికారులు ఒకప్పుడు ప్రయత్నించారు. స్థానికులు తీవ్రంగా వ్యతిరేకించడం వల్ల ఆ ఆలోచనను విరమించుకున్నారు.

ఇదీ చూడండి:-భారతీయులకు గుండె దడ కాస్త ఎక్కువే...!