ప్రధాని మోదీకి మరోసారి ఈసీ క్లీన్​చిట్​

ఎన్నికల సంఘం తాజాగా... మరో రెండు ప్రసంగాలపై ప్రధాని నరేంద్ర మోదీకి క్లీన్​చిట్​ ఇచ్చింది. ఏప్రిల్​ 9, 23 తేదీల్లో మోదీ చేసిన ప్రసంగాలు ఎన్నికల ప్రవర్తనా నియమావళిని ఉల్లంఘించేలా లేవని స్పష్టం చేసింది.

ప్రధానమంత్రి నరేంద్ర మోదీకి ఎన్నికల సంఘం (ఈసీ) మరోసారి క్లీన్​చిట్ ఇచ్చింది. ఎన్నికల ప్రవర్తనా నియమావళిని ఉల్లంఘించేలా మోదీ ప్రసంగించారని అందిన రెండు ఫిర్యాదులను తోసిపుచ్చింది.

ప్రధాని మోదీ ఏప్రిల్​ 23న అహ్మదాబాద్​లో ఓటు హక్కు వినియోగించుకున్న తర్వాత రోడ్​షో నిర్వహించారని.. తద్వారా ఓటర్లను ప్రలోభపెట్టేందుకు ప్రయత్నించారని కాంగ్రెస్ ఆరోపించింది. మోదీ చర్య ఎన్నికల ప్రవర్తనా నియమావళిని ఉల్లంఘించడమే అని ఈసీకి ఫిర్యాదు చేసింది.

అహ్మదాబాద్​లో ఓటు వేసిన తర్వాత పోలింగ్ కేంద్రం నుంచి కొంత దూరం నడిచివెళ్లారు మోదీ. అనంతరం మీడియాతో మాట్లాడారు. ఈ విషయంపై కాంగ్రెస్ చేసిన ఫిర్యాదును విచారించిన ఈసీ... మోదీకి క్లీన్​చిట్​ ఇచ్చింది.

ఈసీలో భిన్నాభిప్రాయాలు

ఏప్రిల్​ 9న కర్ణాటక చిత్రదుర్గలో లోక్​సభ ఎన్నికల ప్రచారంలో పాల్గొన్న మోదీ... తొలిసారి ఓటు హక్కు పొందిన ఓటర్లు బాలాకోట్​ వైమానిక దాడి చేసిన హీరోలకు ఓటు వేయాలని సూచించారు. అదే రోజు మహారాష్ట్ర లాతూర్​లోని ఔషాలోనూ ఇదే విజ్ఞాపన చేశారు. ఈ విషయంలోనూ ప్రధాని మోదీకి ఈసీ క్లీన్​చిట్​ ఇచ్చింది ఈసీ.

ఏప్రిల్​ 9న మోదీ చేసిన ప్రసంగానికి క్లీన్​చిట్​ ఇచ్చే విషయంలో ఈసీలోనే భిన్నవాదనలు వినిపించాయని సమాచారం. ఓ ఎన్నికల అధికారి దీనిపై​ అభ్యంతరం వ్యక్తం చేయడం గమనార్హం.

మోదీకి 8, షాకు 2, రాహుల్​కు ఒకటి

ఈసీ ఇప్పటి వరకు మోదీకి (ఈ రెండు కలిపి) 8 సార్లు, భాజపా అధ్యక్షుడు అమిత్​షాకు 2 సార్లు, కాంగ్రెస్ పార్టీ అధినేత రాహుల్​గాంధీకి ఓసారి క్లీన్​చిట్​ ఇచ్చింది.

సుప్రీంకు ఈసీ నివేదిక

మోదీ, అమిత్​షాలపై నమోదైన 'ఎన్నికల నియమావళి ఉల్లంఘన' ఫిర్యాదుల విచారణను ఈసీ ఆలస్యం చేస్తోందని... కాంగ్రెస్​ సుప్రీంకోర్టును ఆశ్రయించింది. ఈ విషయంలో ఓ నివేదిక ఇవ్వాలని ఈసీని అత్యున్నత న్యాయస్థానం ఆదేశించింది. ఈ విషయంపై సుప్రీం బుధవారం తీర్పు వెలువరించనుంది.

ఇదీ చూడండి: 'గడువు తీరిన ప్రధానితో వేదిక పంచుకోవాలా?'