విదేశాలకు వెళ్లాలంటే.. టోఫెల్, ఐఈఎల్టీఎస్ పరీక్షలను క్లియర్ చేయాలి అని ఠక్కున వచ్చే సమాధానం. అమీర్పేట, దిల్సుఖ్నగర్ ప్రాంతాలకు వెళ్తే చాలు.. ఈ పరీక్షలకు సన్నద్ధమయ్యేందుకు అవసరమైన సంస్థలూ అనేకం. ఎంతో ఏకాగ్రత, పట్టుదలతో చదివితే కానీ నెగ్గని కల. ఇవేవీ లేకుండానే బ్రిటన్కు వెళ్లాలనుకుంటున్నారా? ఈ అవకాశం మీకేనండి. కానీ ఒక్క షరతు. మీరు వైద్య వృత్తికి సంబంధించినవారై ఉండాలి.
వైద్యులు, నర్సులు, దంతవైద్యులు, మంత్రసానులు ఎలాంటి అర్హత పరీక్షల్లో నెగ్గకుండానే తమ దేశంలో పనిచేసే అవకాశం కల్పిస్తోంది బ్రిటన్. మీరు చేయాల్సిందల్లా ఆక్యుపేషనల్ ఇంగ్లీష్ టెస్ట్(ఓఈటీ) పాస్ కావడం, వైద్య రంగానికి చెందిన సంస్థ వద్ద ఆయా వృత్తిలో నమోదై ఉండటమే.
ఏంటీ ఓఈటీ?
అంతర్జాతీయ ఆంగ్ల భాషా పరీక్ష అయిన ఓఈటీ వైద్యరంగానికి అవసరమైన భాషా పరిజ్ఞానాన్ని పరీక్షిస్తుంది. ఆంగ్ల వాతావరణంలో పనిచేయాలని అనుకునే వారికి ఉద్దేశించిన పరీక్ష ఇది. ఈ టెస్టును కేంబ్రిడ్జి విశ్వవిద్యాలయ విభాగమైన కేంబ్రిడ్జి బాక్స్హిల్ లాంగ్వేజ్ అసెస్మెంట్(సీబీఎల్ఏ) నిర్వహిస్తుంది. ఈ పరీక్షను క్లియర్ చేయడం ద్వారా బ్రిటన్, ఐర్లాండ్, ఆస్ట్రేలియా, న్యూజిలాండ్, దుబాయి, సింగపూర్ వంటి దేశాల్లో పనిచేసేందుకు వీలు కల్పిస్తోంది.