'త్వరలోనే కశ్మీర్​లో పెట్టుబడులకు నూతన విధానం'

జమ్ముకశ్మీర్​లోకి పెట్టుబడులను ఆకర్షించేందుకు కేంద్ర ప్రభుత్వం నూతన విధానాన్ని రూపొందిస్తున్నట్లు తెలిపారు కేంద్ర ఆర్థిక మంత్రి నిర్మలా సీతారామన్​. త్వరలోనే వివరాలు వెల్లడిస్తామన్నారు. అమెరికా పర్యటనలో భాగంగా ఈ విషయమై విదేశీ పెట్టుబడిదారులకు భరోసా కల్పించారు.

జమ్ముకశ్మీర్​లో పెట్టుబడులను ఆకర్షించేందుకు సరికొత్త విధానాలపై కేంద్రం కసరత్తు చేస్తోంది. త్వరలోనే వీటిని అందుబాటులోకి తీసుకురానున్నట్టు కేంద్ర ఆర్థికమంత్రి నిర్మలా సీతారామన్​ వెల్లడించారు.

అమెరికా పర్యటనలో ఉన్న ఆర్థిక మంత్రి.. అంతర్జాతీయ ద్రవ్యనిధి సంస్థ(ఐఎంఎఫ్​) ప్రధాన కార్యాలయంలో జరిగిన ఫెడరేషన్​ ఆఫ్​ ఇండియన్​ చాంబర్స్​ ఆఫ్​ కామర్స్​, ఇండస్ట్రీ, అమెరికా-ఇండియా భాగస్వామ్య సదస్సులో పాల్గొన్నారు.కశ్మీర్​లో పెట్టుబడులను ఆకర్షించేందుకు ప్రధానంగా పర్యటకం, చేతివృత్తుల పరిశ్రమ, పట్టు, ఆపిల్​, కుంకుమ ఉత్పత్తుల వంటి కీలక రంగాలను గుర్తించినట్లు మంత్రి పేర్కొన్నారు.

జమ్ముకశ్మీర్​కు ప్రత్యేక ప్రతిపత్తి కల్పించే అధికరణ 370 రద్దు అనంతరం రాష్ట్రాన్ని అన్ని విధాలుగా అభివృద్ధి చేస్తామని ప్రకటించింది ప్రభుత్వం. ఇందులో భాగంగా అనేక చర్యలు చేపట్టింది.

భారత్​ కన్నా మెరుగైన అవకాశం లేదు...

పెట్టుబడులకు అనుకూల వాతావరణం భారత్​లో తప్ప​ ప్రపంచంలో మరెక్కడా లభించదన్నారు నిర్మలా సీతారామన్​. భారత్​లో పెట్టుబడులు పెట్టాలని విదేశీ మదుపర్లను ఆహ్వానించారు. పెట్టుబడులను ఆకర్షించేందుకు సంస్కరణలు కొనసాగుతాయన్నారు. ప్రభుత్వం అన్ని రకాలుగా అండగా ఉంటుందని భరోసా కల్పించారు.

ఇదీ చూడండి: ఎన్నికల సమరం: 'మహా' మొగ్గు ఎటువైపు?