దేశ రాజధాని దిల్లీ నగరం కాలుష్యం గుప్పిట్లో చిక్కుకుంది. కాలుష్యం కారణంగా వాయునాణ్యత పూర్తిగా క్షీణించడం వల్ల రాష్ట్ర ప్రభుత్వం ఇప్పటికే ఆరోగ్య అత్యవసర పరిస్థితిని ప్రకటించింది. నవంబరు 5 వరకు పాఠశాలలకు సెలవులు ప్రకటించింది. 50 లక్షల మాస్కులను ప్రజలకు పంపిణీ చేసింది. కాలుష్యాన్ని నియత్రించేందుకు.. మళ్లీ నేటి నుంచి సరి-బేసి విధానాన్ని అమలు చేస్తోంది. ఇవాళ ఉదయం 8 గంటల నుంచి రాత్రి 8 వరకు కేవలం సరి సంఖ్యలు గల వాహనాలనే దిల్లీ రహదారులపైకి అనుమతిస్తారు.
పిల్లల ఆరోగ్యం కోసం దిల్లీ ప్రజలందరూ ఈ నిబంధనను పాటించాలని ముఖ్యమంత్రి అరవింద్ కేజ్రీవాల్ విజ్ఞప్తి చేశారు. ఆంక్షల వల్ల సామాన్య ప్రజలకు ఎటువంటి ఇబ్బందులు కలగకుండా చూడాలని యంత్రాంగాన్ని ఆదేశించారు.
ఎలా...
నేటి నుంచి నవంబర్ 15 వరకు ఈ సరి-బేసి నిబంధన అమలుకానుంది. దీని ప్రకారం.. రిజిస్ట్రేషన్‌ నంబరులో చివరి అంకె సరి ఉన్న వాహనాలన్నీ ఒక రోజు, బేసి ఉన్న వాహనాలన్నీ మరో రోజు రోడ్డు మీదకు రావాల్సి ఉంటుంది. నవంబర్ 10.. ఆదివారం మాత్రం ఈ నిబంధనను సడలించారు.