తమి​ళనాడు​లో 9వ శతాబ్దంలోనే సైకిల్​..!

భారత్​లో సైకిల్​ ఎప్పటి నుంచి వినియోగంలోకి వచ్చిందని మిమ్మల్ని అడిగితే..? 18వ శతాబ్దంలో అని తడబడకుండా చెప్పేస్తారు కదూ! కానీ, తమిళనాడులో 9వ శతాబ్దంలో కట్టిన పంచవర్ణేశ్వర ఆలయంలో దొరికిన ఆధారాలు చూస్తే ముక్కున వేలేసుకుంటారు..!

బ్రిటిష్ పాలనలోనే భారతీయులకు సైకిల్ పరిచయమైందనుకునే వారిని.. తమిళనాడు తిరుచ్చిలో బయటపడ్డ 9వ శతాబ్దపు సైకిల్​ ఆనవాళ్లు ఆశ్చర్యానికి గురిచేస్తున్నాయి. అవును, ఓ వ్యక్తి సైకిల్ నడుపుతున్న చిత్రాలు పంచవర్ణేశ్వర ఆలయ స్తంభాలపై దర్శనమిస్తున్నాయి. ఈ ఆలయాన్ని 9వ శతాబ్దంలోనే నిర్మించినట్లు ఆధారాలున్నాయని ఇక్కడి ప్రజలు చెబుతున్నారు.

గుర్రాలు, ఎడ్ల బండ్లే కాకుండా భారత దేశంలో సైకిల్​ కూడా ప్రాచీన వాహనమేనని నిరూపించేలా ఉంది స్తంభంపై చెక్కిన ఈ శిల్పం. పూర్వం వ్యాపారస్తులు సామగ్రిని మోసేందుకు ద్విచక్ర వాహనాలను తయారు చేసి ఉపయోగించేవారట. అయితే అవి ఇప్పటి సైకిల్​లాగా చైన్​, బ్రేక్​లు కలిగి ఉండకపోవచ్చునని స్థానికులు అభిప్రాయపడుతున్నారు.

" ఈ రాతి ఆలయాన్ని 9వ శతాబ్దంలో నిర్మించారు. ఈ ఆలయానికి గొప్ప చరిత్ర ఉంది. అప్పట్లో చెట్టియార్​ వర్గానికి చెందిన వారు సైకిళ్లపై వ్యాపారం చేసేవారు. గుడి నిర్మాణ సమయంలో సైకిళ్లు ఉండేవట. అందుకే చరిత్ర తెలిసేందుకు స్తంభాలపై చెక్కించారు ''

_ఆలయ పూజారి.

ఈ ఆలయానికి ఘన చరిత్రే ఉంది. ఈశ్వరుడు పంచవర్ణాల్లో దర్శనిమిస్తాడిక్కడ. ఓసారి కరికాళ అనే చోళ రాజు.. ఏనుగుపై ఈ గుడికి వచ్చినప్పుడు గజరాజు మతిస్తిమితం కోల్పోయి పారిపోయింది. అప్పుడు శివుడు కోడి పుంజు రూపంలో వచ్చి గజరాజుపైకి దూకి, తలను పొడిచి నయం చేశాడట.
ఈ ఆధారాలతో 9వ శతాబ్దంలోనే మన పూర్వీకులు సైకిల్ పై స్వారీ చేసిన దాఖలాలు స్పష్టంగా కనిపిస్తున్నాయని తిరుచ్చి వాసులు చెబుతున్నారు.​