దేశంలో తొలిసారి ఇంగువ సాగు ప్రారంభం

హిమాచల్​ప్రదేశ్​లో ఇంగువ సాగు ప్రారంభించినట్లు సీఎస్ఐఆర్ తెలిపింది. అక్టోబర్ 15న క్వారింగ్ గ్రామంలో సీఎస్​ఐఆర్-ఐహెచ్​బీటీ డైరెక్టర్ డా. సంజయ్ కుమార్ తొలి ఇంగువ విత్తనాన్ని నాటినట్లు వెల్లడించింది. దేశంలో ఇంగువ సాగు ప్రారంభించేందుకు గత 30 ఏళ్లలో చేసిన తొలి ప్రయత్నం ఇదేనని స్పష్టం చేసింది.

హిమాచల్ ​ప్రదేశ్​లో నిరుపయోగమైన శీతల భూభాగాల్లో ఇంగువ పంట పండించేందుకు 'ద ఇన్​స్టిట్యూట్ ఆఫ్ హిమాలయన్ బయోరిసోర్స్ టెక్నాలజీ'(ఐహెచ్​బీటీ-సీఎస్ఐఆర్) నడుం కట్టింది. లాహాల్ ప్రాంతంలో రైతులతో కలిసి ఇంగువ సాగు చేపట్టింది. అక్టోబర్ 15న క్వారింగ్ గ్రామంలో సీఎస్​ఐఆర్-ఐహెచ్​బీటీ డైరెక్టర్ డా. సంజయ్ కుమార్ తొలి ఇంగువ విత్తనాన్ని నాటారని సెంటర్ ఆఫ్ సైంటిఫిక్, ఇండస్ట్రీయల్ రీసెర్చ్(సీఎస్ఐఆర్) తన ప్రకటనలో తెలిపింది.

ఐసీఏఆర్-నేషనల్ బ్యూరో ఆఫ్ జెనెటిక్ రిసోర్సెస్(ఎన్​బీపీజీఆర్) ద్వారా ఇరాన్ నుంచి 2018 అక్టోబర్​లో ఈ విత్తనాలను దిగుమతి చేసుకున్నట్లు సంస్థ వెల్లడించింది. దేశంలో ఇంగువ సాగు ప్రారంభించేందుకు గత 30 ఏళ్లలో చేసిన తొలి ప్రయత్నం ఇదేనని స్పష్టం చేసింది. సీఈహెచ్​ఏబీ, రిబ్లింగ్, లాహాల్, స్పిటి ప్రాంతాల్లో ఇంగువ మొక్కలను పెంచినట్లు పేర్కొంది.

రాష్ట్రంలో ఇంగువ సాగు చేయనున్నట్లు మార్చి 6న తన బడ్జెట్ ప్రసంగంలో హిమాచల్ ప్రదేశ్ ముఖ్యమంత్రి జైరాం ఠాకూర్ ప్రకటించారు. ఈ మేరకు సీఎస్ఐఆర్-ఐహెచ్​బీటీ రాష్ట్ర వ్యవసాయ శాఖ ఒ అవగాహన ఒప్పందం కుదుర్చుకున్నాయి.

ఇప్పటివరకు దిగుమతే

దేశీయ వంటకాల్లో విరివిగా వాడే ఈ విలువైన మసాలాను భారత్ విదేశాల నుంచి దిగుమతి చేసుకుంటోంది. రూ.735 కోట్ల వ్యయంతో అఫ్గానిస్థాన్, ఇరాన్, ఉజ్బెకిస్థాన్​ దేశాల నుంచి ఏటా 1,200 టన్నుల ముడి ఇంగువను తెప్పిస్తోంది. భారత్​లో సరైన వసతులు లేకపోవడం ఇంగువ సాగుకు ప్రధాన అవరోధంగా ఉంది. ఇంగువ విత్తనాలను దిగుమతి చేసుకున్న సీఎస్ఐఆర్-ఐహెచ్​బీటీ.. దేశంలో ఈ పంట పండించేందుకు తీవ్రంగా కృషి చేసింది.