కాలుష్య నియంత్రణపై ఉమ్మడి ప్రణాళికకు సీఎంల వినతి

దేశ రాజధాని దిల్లీలో నెలకొన్న వాయుకాలుష్యంపై కేంద్రం.. రాష్ట్రాల మధ్య పరస్పర విమర్శలు సాగుతున్నాయి.  ఈ నేపథ్యంలో కాలుష్య నియంత్రణకై ఉమ్మడిగా కృషి చేయాలని దిల్లీ పరిసర రాష్ట్రాల ముఖ్యమంత్రులు కేంద్రాన్ని కోరారు.

దిల్లీకి వాయుకాలుష్యం అతిపెద్ద సమస్యగా మారింది. ఈ నేపథ్యంలో కాలుష్య నియంత్రణ కోసం కేంద్రం సత్వరం జోక్యం చేసుకుని ఓ ఉమ్మడి ప్రణాళిక తయారు చేయాలని.. దిల్లీ, హరియాణా, పంజాబ్​ల ముఖ్యమంత్రులు అరవింద్​ కేజ్రీవాల్, కెప్టెన్ అమరీందర్​ సింగ్, మనోహర్​ లాల్ ఖట్టర్ కోరారు.

జావడేకర్ వ్యాఖ్యలపై దుమారం...

వాయునాణ్యత అంశంలో కేంద్ర పర్యావరణ మంత్రి ప్రకాశ్​ జావడేకర్ వ్యాఖ్యలపై మండిపడ్డారు దిల్లీ ఉపముఖ్యమంత్రి మనీశ్​ సిసోడియా. పెచ్చుమీరుతున్న కాలుష్యాన్ని నియంత్రించడం కోసం ఏర్పాటు చేసిన సమావేశాల్ని కేంద్రమంత్రి ప్రకాశ్​ జావడేకర్​ వాయిదా వేశారని ఆయన ఆరోపించారు. సమస్యను పరిష్కరించేందుకు మంత్రికి సమయం లేదని.. దేశ రాజధానిలో వాయు నాణ్యత క్షీణిస్తున్నప్పటికీ పట్టించుకోవడం లేదని విమర్శించారు.

వ్యవసాయ వ్యర్థాలను కాల్చడం ద్వారా పంజాబ్​, హరియాణాలు.. దిల్లీకి కాలుష్యాన్ని పంపిస్తున్నాయని రెండు రాష్ట్రాల ముఖ్యమంత్రులకు విద్యార్థులతో లేఖ రాయించారు దిల్లీ సీఎం అరవింద్ కేజ్రీవాల్​. ఈ నేపథ్యంలో విషయాన్ని కేజ్రీవాల్ రాజకీయం చేస్తున్నారని కేంద్రమంత్రి ప్రకాశ్​ జావడేకర్ ఆరోపించారు.

కేంద్రమంత్రికి కేజ్రీ లేఖ...

దిల్లీ ముఖ్యమంత్రి కేజ్రీవాల్​.. కేంద్రమంత్రి ప్రకాశ్​ జావడేకర్​కు లేఖ రాశారు. ఇది కేవలం దిల్లీ సమస్యే కాదని, ఉత్తర భారత్​కు చెందిన సమస్య అని వ్యాఖ్యానించారు.

ఇదీ చూడండి: మాతృభాషలో 8గంటలు అనర్గళంగా మాట్లాడతారా?