'ఎలాంటి పరిస్థితినైనా ఎదుర్కొనేందుకు సైన్యం సిద్ధం'

తూర్పు లద్దాఖ్​ వాస్తవాధీన రేఖ వెంబడి ఎలాంటి పరిస్థితినైనా ఎదుర్కొనేందుకు భారత సైన్యం సిద్ధంగా ఉన్నట్లు పార్లమెంటరీ కమిటీకి తెలిపారు త్రిదళాధిపతి జనరల్​ బిపిన్ రావత్. కఠినమైన శీతాకాలంలోనూ దీర్ఘకాలం పాటు పోరాటం కొనసాగించే విధంగా సాయుధ దళాలు సన్నద్ధమైనట్లు చెప్పారు.

భారత సాయుధ దళాలు.. తూర్పు లద్దాఖ్ సరిహద్దులో ఎలాంటి పరిస్థితులనైనా ఎదుర్కొనేందుకు సర్వసన్నద్ధమై ఉన్నట్లు పార్లమెంట్​ పబ్లిక్ అకౌంట్స్​ కమిటీ(పీఏసీ)కి వివరించారు త్రిదళాధిపతి జనరల్​ బిపిన్​ రావత్​. శీతాకాలంలో కఠినమైన పరిస్థితుల్లోనూ సుదీర్ఘకాలం సవాళ్లను ఎదుర్కొనేందుకూ సైన్యం సిద్ధంగా ఉన్నట్లు చెప్పారు.

భారత సైన్యానికి అత్యంత నాణ్యమైన దుస్తులు సేకరించే విషయంపై చర్చించేందుకు పీఏసీతో మంగళవారం సమావేశమయ్యారు జనరల్​ రావత్, ఇతర సైనిక ఉన్నత కమాండర్లు. ఈ సందర్భంగానే తూర్పు లద్దాఖ్​లో పరిస్థితులపై ఆయన వివరించినట్లు కమిటీ వర్గాలు తెలిపాయి. భారత సైన్యం సర్వసన్నద్ధతపై రావత్ పూర్తి నమ్మకంగా ఉన్నట్లు పేర్కొన్నాయి. పీఏసీకి కాంగ్రెస్​ లోక్​సభాపక్షనేత అధిర్ రంజన్ చౌదరి నేతృత్వం వహిస్తున్నారు.

తూర్పు లద్దాఖ్​లో బలగాల ఉపసంహరణ అంశంపై భారత్​-చైనా దౌత్య, సైనిక చర్చలు జరపుతున్నాయి. కొన్ని ప్రాంతాల్లో ఈ ప్రక్రియ పూర్తయినా.. ఫింగర్​ ఏరియా ప్రాంతాల నుంచి మాత్రం బలగాలను వెనక్కి తీసుకోవడం లేదు చైనా. కచ్చితంగా ఆ ప్రాంతాల్లో నుంచి వెనక్కి మళ్లాలని చైనాకు.. భారత్ ఇప్పటికే తేల్చిచెప్పింది.

ఉద్రిక్త పరిస్థితుల నేపథ్యంలో ఉత్తర సిక్కిం, ఉత్తరాఖండ్, అరుణాచల్ ప్రదేశ్ సరిహద్దు ప్రాంతాలు సహా తూర్పు లద్దాఖ్​లో కార్యకలాపాలను పెంచింది భారత సైన్యం. చైనాకు దీటుగా బలగాలను మోహరించింది.

శీతాకాలంలో లద్దాఖ్​లో మైనస్ 25 డిగ్రీ సెల్సియస్​​ ఉష్ణోగ్రతలు నమోదవుతాయి. ఎముకలు కొరికే చలి, కఠినమైన వాతావరణ పరిస్థితులను ఎదుర్కొనేందుకు ఇప్పటికే ప్రణాళికలు సిద్ధం చేసింది భారత సైన్యం. సైనికులకు అవసరమైన ఆయుధాలు, దుస్తులు సమకూర్చే పనిలో ఉంది.