బంగాల్‌లో మళ్లీ చెలరేగిన ఘర్షణలు

బంగాల్​లో తృణమూల్​, భాజపా శ్రేణుల మధ్య మరోమారు ఘర్షణలు జరిగాయి. భాజపా హైకమాండ్​ ఆదేశాలతో ముగ్గురు సభ్యుల బృందం భాట్​పారా ప్రాంతంలో పర్యటించి తిరిగివెళ్లిన వెంటనే ఇరు పార్టీలకు చెందిన కార్యకర్తలు పరస్పరం రాళ్ల దాడులకు పాల్పడ్డారు. పోలీసులు లాఠీఛార్జ్ చేసి వీరిని చెదరగొట్టారు.  భాట్​పారాలో 144 సెక్షన్​ విధించారు.

పశ్చిమ బంగాల్‌ ఉత్తర 24 పరగణాల జిల్లాలో మరోసారి ఘర్షణలు చెలరేగాయి. భాట్‌పారాలో భాజపా, తృణమూల్‌ కాంగ్రెస్‌ పార్టీలకు చెందిన కార్యకర్తలు పరస్పరం రాళ్ల దాడులకు దిగారు. నాటు బాంబులు విసురుకున్నారు. ఈ అల్లర్లలో పలువురు గాయపడ్డారు. పోలీసులు లాఠీఛార్జ్​ చేసి అల్లరి మూకలను చెదరగొట్టారు.

భాజపా బృందం పర్యటన

గత గురువారం ఈ ప్రాంతంలో రెండు వర్గాల మధ్య ఘర్షణ జరిగి ఇద్దరు మృతి చెందారు. ఈ నేపథ్యంలో అక్కడికి వెళ్లి పరిస్థితిని సమీక్షించాలని భాజపా హైకమాండ్‌ పార్టీ నేతలను ఆదేశించింది. దీంతో కేంద్ర మాజీ మంత్రి ఎస్‌ఎస్‌ అహ్లూవాలియా నేతృత్వంలో ఎంపీలు సత్యపాల్‌ సింగ్‌, బీడీ రామ్‌ల బృందం భాట్‌పారా ప్రాంతాన్ని సందర్శించింది.

భాట్​పారా ప్రాంతంలో ఇద్దరు వ్యక్తుల మరణానికి పోలీసుల కాల్పులే కారణమని ఆరోపించింది భాజపా బృందం. పోలీసులు ఉపయోగించిన తూటాలను పరిశీలించింది. బంగాల్​లో పరిస్థితులపై భాజపా జాతీయ అధ్యక్షుడు, కేంద్ర హోంమంత్రి అమిత్​ షాకు నివేదిక సమర్పించనున్నట్లు తెలిపింది.

144 సెక్షన్​...

భాజపా నాయకులు వెళ్లిపోయిన వెంటనే మళ్లీ అల్లర్లు చెలరేగాయి. పరిస్థితిని అదుపులోకి తెచ్చేందుకు పోలీసులు లాఠీఛార్జ్‌ చేశారు. తాజా పరిస్థితుల నేపథ్యంలో భాట్‌పారాలో 144 సెక్షన్‌ విధించారు.