సుమిత్రా మహాజన్కు భాజపా సీటిస్తుందా? భాజపా మరో అగ్రనేతకు ఉద్వాసన పలకనుందా? సార్వత్రిక ఎన్నికల సమయంలో ఆడ్వాణీ, మురళీ మనోహర్ జోషి లాంటి సీనియర్ నేతలను పక్కపెట్టిన భాజపా సుమిత్రా మహాజన్కు టికెట్ నిరాకరించనుందా? అనే ప్రశ్నలు ఉత్పన్నమవుతున్నాయి.
మధ్యప్రదేశ్లోని ఇండోర్ లోక్స్థానం నుంచి ఎంపీగా ఉన్నారు సుమిత్రా మహాజన్. అయితే సార్వత్రిక ఎన్నికల కోసం ఆ స్థానానికి ఇంకా ఆమె పేరును ఖరారు చేయలేదు భాజపా. దీంతో ఆమెకు ఈసారి సీటు కేటాయిస్తారా లేదా అనేది చర్చనీయాంశమైంది. లోక్సభ స్పీకర్గానూ విధులు నిర్వర్తిస్తున్నారుసుమిత్ర.
మధ్యప్రదేశ్లోని 29 లోక్సభ స్థానాలకు గాను భాజపా 18 స్థానాలకు అభ్యర్థులను గతంలో ప్రకటించింది. తాజాగా ముగ్గురు ఎంపీ అభ్యర్థులు ప్రకటించింది. వీటిలో మహాజన్ పేరు లేదు.
వయస్సు మళ్లిన వారికి నిరాకరణ!
75 సంవత్సరాలు దాటిన వారు ఎన్నికల్లో పాల్గొనకూడదని భాజపాలో ఓ నిర్ణయం అమలువుతోంది. ఈ నిబంధనను అనుసరించే... పార్టీ వ్యవస్థాపకుల్లో ఒకరైన లాల్కృష్ణ ఆడ్వాణీ, మరో సీనియర్ నేత మురళీ మనోహర్ జోషికి ఈ లోక్సభ ఎన్నికల్లో టికెట్లు ఇవ్వలేదు.
మధ్యప్రదేశ్ అసెంబ్లీ ఎన్నికల్లో మాజీ ముఖ్యమంత్రి బాబులాల్ గౌర్, మాజీ కేంద్రమంత్రి సర్తాజ్సింగ్లకు వయస్సు 75 ఏళ్లు దాటిన కారణంగా భాజపా అవకాశం కల్పించలేదు.
సుమిత్రా రాజకీయ శకం ముగిసిపోతుందా?
మధ్యప్రదేశ్లో సుమిత్రా మహాజన్ను 'తాయ్' ( పెద్ద అక్క) అని సంబోధిస్తారు. ఇప్పుడు ఆమె 75వ యేట అడుగుపెట్టారు. కనుక ఆమెకు కూడా ఈ ఎన్నికల్లో పోటీ చేసే అవకాశాన్ని భాజపా అధినాయకత్వం కల్పించకపోవచ్చనే ప్రచారం జరుగుతోంది.
"ఇదీ పార్టీ అంతర్గత విషయం. బయట మాట్లాడేది కాదు. పార్టీ ఓ నిర్ణయం తీసుకుంటుంది. నేను 'అవును' అని కానీ 'కాదు' అని కానీ చెప్పలేదు. ఇప్పటి వరకు నాతో ఎవరూ ఈ విషయం గురించి చర్చించలేదు. కనుక నేను మీతో ఏమీ చెప్పలేను. నేను పార్టీలో సీనియర్ కార్యకర్తను. ఇప్పుడు నేను బాధ్యతాయుతమైన ఎంపీ స్థానంలో ఉన్నాను. ఈ సార్వత్రిక ఎన్నికల్లో భాజపా విజయం కోసం కృషి చేస్తాను. "- సుమిత్రా మహాజన్, లోక్సభ స్పీకర్, ఇండోర్ ఎంపీ
మరో అవకాశం ఉండకపోవచ్చు..
మరోవైపు సుమిత్రా మహాజన్కు ఈ ఎన్నికల్లో భాజపా తరుపున పోటీచేసే అవకాశం ఉండకపోవచ్చని ఆ పార్టీ (భాజపా) కీలక నేత వ్యాఖ్యానించారు. 2014 లోక్సభ ఎన్నికల్లో సుమిత్రా మహాజన్ ఇండోర్ స్థానంలో కాంగ్రెస్ అభ్యర్థి సత్యనారాయణ పాటిల్పై 4,66,901 ఓట్ల భారీ మెజారిటీతో గెలుపొందారు.
