'కాంగ్రెస్​ కార్యకర్తలారా.. వరద బాధితులను ఆదుకోండి'

అసోం వరద బాధితులను ఆదుకోవాలని కాంగ్రెస్ కార్యకర్తలకు పిలుపునిచ్చారు ఆ పార్టీ అగ్రనేత రాహుల్​ గాంధీ. రాష్ట్ర ప్రజలకు దేశమంతా అండగా ఉంటుందన్నారు. అసోం ప్రజలు ప్రకృతి విపత్తును అధిగమిస్తారని విశ్వాసం వ్యక్తం చేశారు.

అసోం ప్రజలకు దేశమంతా అండగా నిలుస్తుందన్నారు కాంగ్రెస్​ అగ్రనేత రాహుల్ గాంధీ. వరదల కారణంగా తీవ్ర ఇబ్బందులు ఎదుర్కొంటున్న రాష్ట్ర ప్రజలు ప్రకృతి విపత్తును అధిగమిస్తారని విశ్వాసం వ్యక్తం చేశారు. అసోంలోని వరద బాధితులను ఆదుకోవాలని ట్విట్టర్ వేదికగా పిలుపునిచ్చారు రాహుల్​. ఈ మేరకు హిందీలో ట్వీట్​ చేశారు.

" దేశం మొత్తం అసోంకు అండగా ఉంది. వరదల సమస్యను అధిగమించేందుకు రాష్ట్ర ప్రజలు ధైర్యసాహసాలతో పోరాడుతున్నారు. కాంగ్రెస్ కార్యకర్తలు సాధ్యమైనంత సాయం అందించాలి "

-రాహుల్ గాంధీ ట్వీట్.

అసోంలో వరదలు బీభత్సం సృష్టిస్తున్నాయి. 33 జిల్లాలకు గాను 28 జిల్లాలు జల దిగ్బంధంలో ఉన్నాయి. 35లక్షల మంది ప్రభావితమయ్యారు.

వరదల కారణంగా సంభవించిన ప్రమాదాల్లో 76మంది, కొండచరియలు విరిగిపడిన ఘటనల్లో 26మంది ప్రాణాలు కోల్పోయారు.