గాడిదల పెళ్లికి ఊరి పెద్దల హడావుడి!

తమిళనాడు అన్నూర్​లో వర్షాలు కురవడంలేదని రెండు గాడిదలకు పెళ్లి చేశారు గ్రామస్థులు.  బ్యానర్​ కట్టి, బ్యాండ్​ బాజాతో గుడిలో ఘనంగా వివాహం జరిపించారు. ఈ వేడుకకు వచ్చిన అతిథులు కట్న కానుకలు సమర్పించి, నవ గాడిద దంపతులను దీవించారు.

తమిళనాడులో గాడిదల వివాహం అంగరంగ వైభవంగా జరిగింది. కోయంబత్తూర్​లోని అన్నూర్​లో వరుణుడిని ప్రసన్నం చేసుకోడానికి రెండు గాడిదలకు ఘనంగా పెళ్లి చేశారు గ్రామస్థులు. నూతన వధూవరులను ఆశీర్వదించేందుకైనా వర్షాలతో కనికరిస్తాడని వారి ఆశ.

గాడిదలవారి వివాహమహోత్సవం!

ఏదో తూతూమంత్రంగా జరగలేదు ఈ గాడిదల పెళ్లి. హిందూ సంప్రదాయం ప్రకారం గాడిదలను పట్టు వస్త్రాలతో ముస్తాబు చేశారు. వేదిక వద్ద గాడిదల ఫొటోలతో ఫ్లెక్సీలు కట్టించారు.

పెళ్లి కొడుకు, పెళ్లి కూతుళ్లను బాజా భజంత్రీలతో ఊరేగింపుగా సుబ్రమణ్య స్వామి ఆలయానికి​ తీసుకెళ్లారు. స్వామి వారి సాక్షిగా, వేదమంత్రాల నడుమ పెళ్లి చేశారు. వధువు గాడిదకు తాళి కట్టేందుకు.. వరుడు గాడిదకు గ్రామస్థులంతా సాయం చేశారు.
పెళ్లికొచ్చిన అతిథులంతా నవ వధూవరూలను దీవించారు. కట్నాలూ, కానుకలూ సమర్పించి కడుపారా వారి సంప్రదాయ కంబన్​కుల్​ను విందుగా స్వీకరించారు.

దేశంలోని అనేక ప్రాంతాలు వరదల్లో మునకలేస్తూంటే అన్నూరు మాత్రం వర్షాలు లేక ఎండిపోతోంది. తీవ్రమైన నీటి కొరతతో ప్రజలు సతమతమవుతున్నారు.

ఇదీ చూడండి:వైరల్​: పోలీసునే పరుగులు పెట్టించిన మహిళ