'భారత విద్యార్థులపై 'వీసా రద్దు' ప్రభావాన్ని తగ్గిస్తాం'

విదేశీ విద్యార్థుల వీసా రద్దుపై భారత్​ ఆందోళన వ్యక్తం చేయగా అమెరికా సానుకూలంగా స్పందించింది. భారతీయుల విద్యార్థుల ప్రయోజనాలను దృష్టిలో పెట్టుకుని నిర్ణయ ప్రభావాన్ని తగ్గించేందుకు ప్రయత్నిస్తామని చెప్పినట్లు అధికారవర్గాలు తెలిపాయి.

విదేశీ విద్యార్థుల వీసాల ఉపసంహరణపై అమెరికా తీసుకున్న నిర్ణయాన్ని ఆ దేశంతో భారత్​ ప్రస్తావించిందని అధికారిక వర్గాలు తెలిపాయి. అమెరికా రాజకీయ వ్యవహారాల కార్యదర్శి డేవిడ్ హేల్​తో భారత విదేశాంగ కార్యదర్శి హర్షవర్ధన్ ష్రింగ్లా మధ్య జరిగిన ద్వైపాక్షిక భేటీలో ఈ మేరకు చర్చించినట్లు తెలుస్తోంది.

అమెరికాలోని విశ్వవిద్యాలయాలు ఆన్​లైన్​ తరగతులను పూర్తి స్థాయిలో నిర్వహిస్తే అందులో చదవి విదేశీ విద్యార్థుల వీసాలను రద్దు చేస్తామని అమెరికా ప్రకటించింది. దీని వల్ల భారతీయ విద్యార్థులు నష్టపోయే అవకాశం ఉందని హేల్​తో ష్రింగ్లా వివరించినట్లు విశ్వసనీయ వర్గాలు తెలిపాయి.

సానుకూల స్పందన..

అమెరికా తరఫున ఈ విషయాన్ని పరిశీలిస్తామని హేల్ చెప్పినట్లు అధికారవర్గాలు తెలిపాయి. భారతీయ విద్యార్థుల ప్రయోజనాలను దృష్టిలో ఉంచుకుని.. నిర్ణయ ప్రభావాన్ని తగ్గించడానికి ప్రయత్నిస్తామని చెప్పినట్లు సమాచారం. తాజా నిర్ణయానికి సంబంధించి వివరణాత్మక మార్గదర్శకాలు ఇంకా రాలేదని హేల్​.. భారత్​కు స్పష్టం చేసినట్లు తెలుస్తోంది.

విదేశీ విద్యార్థుల్లో భయాలు..

ఇప్పటికే హెచ్‌-1బీ వంటి పలు వీసాలు, గ్రీన్‌కార్డుల జారీపై నిషేధం విధించిన అమెరికా ప్రభుత్వం మరో అనూహ్య నిర్ణయం తీసుకుంది. విశ్వవిద్యాలయాల పునఃప్రారంభంపై ఒత్తిడి పెంచేందుకు అగ్రరాజ్య ఇమ్మిగ్రేషన్​ అండ్​ కస్టమ్స్​ ఎన్​ఫోర్స్​మెంట్ సిద్ధమైంది​.

కరోనా వ్యాప్తి నేపథ్యంలో పూర్తిస్థాయిలో ఆన్‌లైన్‌ తరగతులు నిర్వహించేందుకు విద్యాసంస్థలు సిద్ధమైనట్లయితే విదేశీ విద్యార్థులు దేశం విడిచి వెళ్లాల్సి ఉంటుందని ప్రకటించింది. ఈ నిర్ణయంతో వేలాది మంది విదేశీ విద్యార్థుల్లో భయాందోళనలు నెలకొన్నాయి.

హిందూ-పసిఫిక్ ప్రాంతంపై..

ఈ భేటీలో హిందూ- పసిఫిక్ ప్రాంతంలో స్వేచ్ఛ, శాంతికి కృషి చేస్తామని రెండు దేశాలు కట్టుబడి ఉంటామని పునరుద్ఘాటించాయి. ఔషధాలతోపాటు ఆరోగ్య రంగంలో రెండు దేశాల మధ్య భాగస్వామ్యాన్ని మరింత బలోపేతం చేసేందుకు అంగీకరించాయి.

ఇదీ చూడండి:విదేశీ విద్యార్థులకు అమెరికా భారీ షాక్​!