సీఎం మౌనంపై కమల్​ ధ్వజం

తమిళనాడులో దుమారం రేపుతున్న పొల్లాచ్చి లైంగింక వేధింపుల కేసుపై మక్కల్​ నీది మయ్యం పార్టీ అధినేత కమల్​ హాసన్​ స్పందించారు. ఈ విషయంపై సీఎం పళనిస్వామి మౌనంగా ఉండడాన్ని విమర్శించారు.

పొల్లాచ్చి లైంగిక వేధింపుల కేసుపై ఆధికార అన్నాడీఎంకే పార్టీ నిర్లక్ష్యంగా వ్యవహరిస్తోందని మక్కల్​ నీది మయ్యం పార్టీ అధినేత కమల్ హాసన్​ ఆగ్రహం వ్యక్తం చేశారు.

తమిళనాడు కోయంబత్తూరు సమీపంలోని పొల్లాచ్చిలో జరిగిన దారుణమైన ఘటనపై రాష్ట్రం మొత్తం నిరసనలు వ్యక్తమవుతున్నాయి.

రాష్ట్రంలో ఇంత జరుగుతున్నా ముఖ్యమంత్రి పళనిస్వామి మౌనంగా ఉన్నారని విమర్శించారు కమల్.

ఈ మేరకు ఆయన అధికారిక ట్విట్టర్​ ఖాతాలో ఓ వీడియోను పోస్ట్​ చేశారు. అందులో అన్నాడీఎంకే ప్రభుత్వంపై విమర్శలు గుప్పించారు కమల్​. బాధితుల పేర్లు బయటికి రావడం సహా ఆందోళన చేస్తున్న విద్యార్థులను బలవంతంగా తరిమికొట్టడంపై మండిపడ్డారు.

ఈ విషయాలన్నీ వినబడటం లేదా సీఎం... అంటూ ప్రశ్నించారు.

మహిళలపై లైంగింక దాడులను తీవ్ర నేరంగా పరిగణించడం, కేసును సీనియర్ అధికారులతో దర్యాప్తు చేయించాలన్న దివంగత ముఖ్యమంత్రి జయలలిత మాటలను గుర్తుచేశారు. జయలలిత అడుగుజాడల్లో ప్రభుత్వాన్ని నడిపిస్తున్నట్లు చెప్పుకునే అన్నాడీఎంకే... ఈ అంశంపై ఎటువంటి చర్యలు తీసుకోవడం లేదని ధ్వజమెత్తారు.