ఆపరేషన్​ కరోనా: ముంబయి నుంచి వుహాన్​కు జంబో విమానం

కరోనా వ్యాప్తి మొదలైన నగరం వుహాన్​లో చిక్కుకున్న భారతీయులను తీసుకొచ్చేందుకు ప్రత్యేక భారీ విమానాన్ని సిద్ధంచేసింది ప్రభుత్వం. భారత విదేశాంగ శాఖ నుంచి ఆదేశాలు రాగానే ముంబయి నుంచి ఈ విమానాన్ని చైనాకు పంపనున్నారు.

కరోనా వైరస్​ వెలుగు చూసిన నగరం వుహాన్​లో చిక్కుకున్న భారతీయులను తీసుకొచ్చేందుకు ప్రభుత్వం సిద్ధమయింది. ఇందుకోసం ప్రత్యేకంగా భారీ విమానాన్ని ముంబయి నుంచి పంపేందుకు ఏర్పాట్లు చేసింది.

దిల్లీలో కేబినెట్​ సెక్రటరీ సమావేశంలో చైనాలో ఉన్న భారతీయుల తరలింపుపై తీసుకోవాల్సిన చర్యల గురించి సోమవారం చర్చించారు. విమానం పంపాలని నిర్ణయించారు. భారత విదేశాంగ శాఖ నుంచి ఆదేశాలు రాగానే విమానం బయలుదేరుతుందని తెలుస్తోంది.

"423 మంది కూర్చునే సామర్థ్యం ఉన్న ఎయిర్​ ఇండియాకు చెందిన బోయింగ్​ 747-400 ముంబయి విమానాశ్రయంలో సిద్ధంగా ఉంది. విదేశాంగ శాఖ నుంచి ఆదేశాలు రాగానే చైనాకు విమానం బయలుదేరుతుంది. వైరస్​ వ్యాప్తి చెందిన ప్రదేశానికి సిబ్బందిని తీసుకెళ్లేందుకు ఆరోగ్య శాఖ కూడా ఇందుకు అనుమతి ఇవ్వాల్సి ఉంది."

-ప్రభుత్వ వర్గాలు

వుహాన్​లో 250 నుంచి 300 వరకు భారతీయులు, ముఖ్యంగా విద్యార్థులు చిక్కుకుపోయారు. వారి ఆరోగ్య పరిస్థితులపై ఆందోళన నెలకొంది.

బీజింగ్​లోని భారత రాయబారులు వుహాన్​ యంత్రాంగంతో కలిసి ఈ అంశంపై సంప్రదింపులు జరిపారు. భారతీయులను తక్షణమే అక్కడి నుంచి తరలించేందుకు అందుబాటులో ఉన్న అవకాశాలను పరిశీలిస్తున్నట్లు తెలిపింది భారత రాయబార కార్యాలయం.

ఇదీ చూడండి: మరిన్ని దేశాలకు 'కరోనా'- భారత్​లో పెరిగిన కేసులు