వెనక్కైనా వెళ్లిపోతాం కానీ.. క్వారంటైన్​ వద్దు బాబోయ్​!

లాక్​డౌన్​ కారణంగా స్వస్థలాలకు చేరుకోవడమే గగనమైన ప్రస్తుత పరిస్థితుల్లో.. కొంతమంది మాత్రం వచ్చిన అవకాశాన్ని వదులుకున్నారు. రాష్ట్ర ప్రభుత్వాలు తప్పనిసరి చేసిన సంస్థాగత క్వారంటైన్​ను వ్యతిరేకిస్తూ నిరసన ప్రదర్శన చేశారు. చివరకు చేసేదేమీ లేక సదరు ప్రయాణికులను బయలుదేరిన చోటికే పంపించారు అధికారులు.

వివిధ రాష్ట్రాల్లో చిక్కుకుపోయిన వారిని స్వస్థలాలకు చేరుకోవడానికి వీలుగా రైల్వే శాఖ ప్రత్యేక సర్వీసులను ఇదివరకే ప్రారంభించింది. సొంత రాష్ట్రాల్లో చేరిన తర్వాత అక్కడి ప్రభుత్వాల మార్గదర్శకాలకు అనుగుణంగా ప్రయాణికులు నిర్బంధంలో ఉండాలని కేంద్రం స్పష్టం చేసింది.

అయితే దిల్లీ నుంచి బెంగళూరుకు చేరుకున్న రైలులోని కొంతమంది ప్యాసింజర్లు సంస్థాగత(ఇన్​స్టిట్యూషనల్) క్వారంటైన్​ను వ్యతిరేకించినట్లు భారతీయ రైల్వే తెలిపింది. మొత్తం 543 మంది ప్యాసింజర్లలో దాదాపు 140 మంది ప్రయాణికులు.. క్వారంటైన్​కు వ్యతిరేకంగా నిరసన వ్యక్తం చేసినట్లు స్పష్టం చేసింది.

రాష్ట్ర ప్రభుత్వ అధికారులు, పోలీసులు నచ్చజెప్పడం వల్ల కొంత మంది క్వారంటైన్​కు తరలివెళ్లేందుకు ఒప్పుకొన్నట్లు అధికారులు తెలిపారు. అయితే 19 మంది మాత్రం తిరిగి దిల్లీకి వెళ్లేందుకే మొగ్గుచూపారట. సంస్థాగత క్వారంటైన్​ బదులుగా హోమ్ క్వారంటైన్​కే వారు సముఖత వ్యక్తం చేసినట్లు సమాచారం. దీంతో రైలుకు మరో కోచ్​ జత చేసి వారిని దిల్లీకి తరలించే ఏర్పాట్లు చేసినట్లు రైల్వే యంత్రాగం తెలిపింది.

బెంగళూరుకి చేరుకున్న రైలులోని ప్రయాణికులు