ఈ 10 రాష్ట్రాల్లోనే 86% కరోనా యాక్టివ్​ కేసులు!

యావత్​ దేశంలో యాక్టివ్​గా ఉన్న కరోనా కేసుల్లో దాదాపు 86 శాతం కేవలం 10 రాష్ట్రాలకు చెందినవేనని వెల్లడించింది ఆరోగ్య శాఖ. అయితే, ప్రపంచ దేశాలతో పోల్చితే భారత్​లో కరోనా మరణాల రేటు తక్కువగానే ఉన్నట్లు స్పష్టం చేసింది.

దేశంలోని ఓ పది రాష్ట్రాల్లో కొవిడ్​ మహమ్మారి విజృంభిస్తోందని వెల్లడించింది ఆరోగ్య శాఖ. ఇప్పటివరకు దేశంలో నమోదైన మొత్తం యాక్టివ్​ కేసుల్లో 86 శాతం ఆ పది రాష్ట్రాల్లోనే నమోదవ్వడం ఇందుకు నిదర్శనమని స్పష్టం చేసింది.

భారత్​లో కొవిడ్​ కేసుల సంఖ్య తొమ్మిది లక్షలు దాటిపోయిన వేళ... ఆరోగ్య శాఖ అధికారి రాజేశ్​ భూషన్​ మీడియాతో మాట్లాడారు. 'దేశంలో నమోదైన మొత్తం కేసుల్లో దాదాపు 50 శాతానికి పైగా మహారాష్ట్ర , తమిళనాడు రాష్ట్రాల నుంచి నమోదైనవే. మరో 39 శాతం కేసులు కర్ణాటక, దిల్లీ, ఆంధ్రప్రదేశ్, ఉత్తర్​ప్రదేశ్​, తెలంగాణ, బంగాల్​, గుజరాత్​, అసోం రాష్ట్రాల నుంచి వెలువడ్డవే' అన్నారు. దేశంలో కోలుకున్న వారి సంఖ్య ప్రస్తుతం చికిత్స పొందుతున్నవారికంటే1.8 రెట్లు ఎక్కువ అని ఆయన చెప్పుకొచ్చారు.

ఇక 22 రాష్ట్రాల్లో.. ప్రతి పదిలక్షల మందిలో రోజుకు కనీసం 140 టెస్టులు చేస్తున్నట్లు తెలిపిన రాజేశ్​ ప్రపంచ దేశాలతో పోలిస్తే... భారత్​లో మరణాల రేటు తక్కువగానే ఉన్నట్లు స్పష్టం చేశారు​. దేశంలో నమోదైన కరోనా కేసుల్లో 2.6 శాతం మంది మృతి చెందుతున్నారని, ఈ రేటు క్రమంగా తగ్గుతోందన్నారు.

ఇదీ చదవండి: గాలి ద్వారా కరోనా.. అడ్డుకోవడం ఎలా?