ABG Shipyard Scam: దేశంలో మరో భారీ మోసం బయటపడిందది. నౌకల తయారీ రంగానికి చెందిన ఏబీజీ షిప్‌యార్డ్‌ దేశంలోని పలు బ్యాంకులను రూ.22,842 కోట్లకు మోసగించినట్లు ఆరోపణలు వస్తున్నాయి. ఈ వ్యవహారంలో ఇప్పటికే దర్యాప్తు చేపట్టిన సీబీఐ కంపెనీ డైరెక్టర్లపై కేసు నమోదు చేసినట్లు జాతీయ మీడియా కథనాలు పేర్కొంటున్నాయి.
మొత్తం 28 బ్యాంకులను ఏబీజీ షిప్‌యార్డ్‌ మోసం చేసినట్లు తెలుస్తోంది. ఇందులో ప్రభుత్వ రంగ బ్యాంకింగ్ సంస్థ స్టేట్‌ బ్యాంక్‌ ఆఫ్‌ ఇండియాతో పాటు ఐసీఐసీఐ, ఐడీబీఐ వంటి బ్యాంకులు ఉన్నాయి. ఈ కుంభకోణంపై ఇప్పటికే ఎస్‌బీఐ ఫిర్యాదు కూడా చేసింది. ఏబీజీ కంపెనీ స్టేట్‌ బ్యాంక్‌ ఆఫ్‌ ఇండియాకు రూ.2,925కోట్లు, ఐసీఐసీఐ బ్యాంక్‌కు రూ.7,089కోట్లు, ఐడీబీఐ బ్యాంక్‌కు రూ.3,634కోట్లు, బ్యాంక్‌ ఆఫ్‌ బరోడాకు రూ.1,614కోట్లు, పీఎన్‌బీ బ్యాంక్‌కు రూ.1,244కోట్లు, ఇండియన్‌ ఓవర్సీస్‌ బ్యాంక్‌కు రూ.1,228కోట్లు రుణాలు చెల్లించాల్సి ఉందని ఎస్‌బీఐ తన ఫిర్యాదులో పేర్కొంది.