Two Millitants Surrendered: ఇది తప్పుదారి పట్టిన తన కొడుకును కాపాడుకునేందుకు ఓ తల్లి పడుతున్న ఆవేదన. పోలీసుల ముందు లొంగిపోవాలని ఉగ్రవాదిగా మారిన తన కుమారుడిని ఓ అమ్మ వేడుకుంటున్న దృశ్యమిది. ఎంతటి కఠిన హృదయాన్నైనా కరిగించే తల్లి ప్రేమ ఆ ఉగ్రవాది మనసును మార్చేసింది. తాను చేసిన తప్పు తెలుసుకున్న ఆ ముష్కరుడు.. తల్లిదండ్రుల మాట విని పోలీసుల ముందు లొంగిపోయాడు. కుల్గాంలో జరిగిన రెండు ఘటనల్లో ఇద్దరు ముష్కరులు తల్లిదండ్రుల మాట విని లొంగిపోయారు.
జమ్ముకశ్మీర్‌లోని కుల్గాం జిల్లాలో భద్రతా బలగాలు జరిపిన యాంటీ టెర్రర్ ఆపరేషన్‌లో ఓ ఇంట్లో ఇద్దరు ఉగ్రవాదులు నక్కి ఉన్నారని భద్రతా బలగాలు గుర్తించాయి. వెంటనే వారి తల్లిదండ్రులకు ఆ విషయాన్ని చేరవేసి వారు లొంగిపోయేలా చేసేందుకు ప్రయత్నించాయి. తల్లిదండ్రులు బతిమాలడంతో ఆ ఇద్దరు ముష్కరులు లొంగిపోయారు. అనంతరం వారి నుంచి ఆయుధాలు, భారీగా మందుగుండు సామగ్రిని పోలీసులు స్వాధీనం చేసుకున్నారు. లొంగిపోయిన ఇద్దరు ముష్కరులు ఇటీవలే ఉగ్రవాద సంస్థల్లో చేరినట్లు పోలీసులు తెలిపారు. ఈ ప్రాంతంలో ఇంకా ఉగ్రవాదుల అలజడి ఉందని, అందుకే ఇంకా ఆపరేషన్‌ను కొనసాగిస్తున్నట్లు భారత బలగాలు వెల్లడించాయి.