ప్రధానితో భేటీకి 14 మంది జమ్ము నేతలకు ఆహ్వానం

జమ్ముకశ్మీర్ రాజకీయ పార్టీలతో ప్రధాని నరేంద్ర మోదీ ఈ నెల 24న భేటీ కానున్నారు. ఈ మేరకు 14 మంది నేతలకు ఆహ్వానం పంపారు అధికారులు.

జమ్ముకశ్మీర్​లోని రాజకీయ పార్టీల నేతలతో ఈ నెల 24న ప్రధాని నరేంద్ర మోదీ సమావేశం కానున్నారు. ఈ మేరకు 14 మంది నేతలకు ఆహ్వానం పంపినట్లు అధికారులు తెలిపారు. నలుగురు మాజీ ముఖ్యమంత్రులను ఆహ్వానించినట్లు పేర్కొన్నారు.

కేంద్ర హోంశాఖ కార్యదర్శి అజయ్ భల్లా ఈ మేరకు జమ్ముకశ్మీర్​ నేతలతో మాట్లాడారు. ఫరూక్ అబ్దుల్లా, ఒమర్ అబ్దుల్లా, సీనియర్ కాంగ్రెస్ నేత గులామ్​నబీ ఆజాద్, పీడీపీ చీఫ్ మెహబూబా ముఫ్తీని.. ప్రధాని మోదీతో జరిగే సమావేశానికి హాజరుకావాలని ఆహ్వానించారు.

ఇతర నేతలు..

సీపీఎం నేత మహమ్మద్ యూసుఫ్ తరిగామి, జేకేఏపీ చీఫ్ అల్తాఫ్ బుఖారి, పీపుల్స్ కాన్ఫరెన్స్​కు చెందిన సజ్జద్ లోనే, జమ్ముకశ్మీర్ కాంగ్రెస్ అధ్యక్షుడు జీఏ మీర్, భాజపాకు చెందిన రవీందర్​ రైనా, పాంతర్స్​ పార్టీ నేత భీమ్​ సింగ్​నూ ఆహ్వానించినట్లు అజయ్ భల్లా పేర్కొన్నారు.

కశ్మీర్​లో అసెంబ్లీ ఎన్నికలు, రాజకీయ ప్రక్రియల పునరుద్ధరణపై ఈ సమావేశంలో చర్చించనున్నారు. 2019 ఆగస్టులో జమ్ముకశ్మీర్​ ప్రత్యేకహోదాను రద్దు చేసి, రాష్ట్రాన్ని కేంద్ర పాలిత ప్రాంతాలుగా విభజించారు. ఆ తర్వాత చేపట్టిన తొలి రాజకీయ ప్రక్రియ ఇదే కానుంది.

స్పష్టత లేదు..

కేంద్రం నుంచి ఆహ్వానం అందినప్పటికీ ఈ సమావేశానికి హాజరవుతామా లేదా అన్నదానిపై స్పష్టత లేదని అన్నారు జమ్ముకశ్మీర్​ నేతలు.

"మోదీతో సమావేశానికి ఆహ్వానం అందింది. పార్టీ నేతలతో రేపు సమావేశం కావాలి. ఈ అంశంపై చర్చ జరిపి.. ఓ నిర్ణయానికి వచ్చాకే సమావేశానికి హాజరవ్వాలా లేదా అనే దానిపై స్పష్టత వస్తుంది".

--మెహబూబా ముఫ్తీ, పీడీపీ చీఫ్.

దీనిపై స్పందించిన నేషనల్​ కాన్ఫరెన్స్ నేత ఒమర్ అబ్దుల్లా.. 'ఆహ్వానం అందిన మాట నిజమే, కానీ పార్టీ నేతలతో చర్చ జరిపి తుది నిర్ణయం తీసుకున్నాకే సమావేశానికి హాజరవుతా' అని అన్నారు. కాంగ్రెస్​ సహా ఇతర నాయకులు కూడా.. పార్టీ నేతలతో చర్చ జరిపాకే అంతిమ నిర్ణయం తీసుకుంటామని వత్తాసు పలికారు.

ఇదీ చదవండి:PM Modi: జమ్ముకశ్మీర్ రాజకీయ పార్టీలతో ప్రధాని భేటీ!