శ్రీకాకుళం జిల్లా నుంచి పలువురు మత్స్యకారులు ఉపాధి నిమిత్తం గుజరాత్‌లోని వీరావల్‌ ప్రాంతానికి వెళ్లారు. విజయనగరం జిల్లా వారు కూడా ఈ బృందంలో ఉన్నారు. దాదాపుగా అయిదారు వేల మంది ఇప్పుడు అక్కడ చిక్కుకుపోయారు. లాక్‌డౌన్‌ ప్రకటించాక చేపల వేట నిలిపేశారు. లాక్‌డౌన్‌కు ముందే సముద్రంలో చేపల వేటకు వెళ్లిన ఒక్కో బోటు క్రమంగా ఒడ్డుకు చేరుకుంటోంది. ప్రస్తుతం వారు వేటాడి వచ్చిన బోట్లే ఆవాసాలుగా మారాయి. ధరించటానికి సరైన దుస్తులు లేవు. రాత్రయితే దోమల బాధ. ఒక్కో బోటులో దాదాపు 15 మంది ఉంటున్నారు. వీరిని తీసుకువెళ్లిన కొందరు గుత్తేదారులు సరిగా పట్టించుకోవటం లేదు. తాము సముద్ర తీరంలోనే ఉన్నా... నగరాల నుంచి వస్తున్న వారి వల్ల తమకు ఎక్కడ కరోనా వ్యాపిస్తుందోనని వారు భయపడుతున్నారు. తమను జిల్లాకు తీసుకువచ్చి ‘క్వారంటైన్‌’లో ఉంచాలని వీరావల్‌లోని మత్స్యకారులు విన్నవిస్తున్నారు.
హార్బర్‌ నుంచి తరిమేస్తున్నారు...!