'మేము పెయిడ్ ఆర్టిస్టులు కాదు... ఇవిగో మా ఆధార్ కార్డులు'
నూతన సంవత్సరంలోనైనా తమకు న్యాయం జరిగేలా సీఎం జగన్ పాలించాలని అమరావతి రైతులు కోరారు. తుళ్లూరులో 14వ రోజుకు చేరుకున్న మహాధర్నాలో పెద్దసంఖ్యలో రైతులు పాల్గొన్నారు. పెయిడ్ ఆర్టిస్టులు అనే విమర్శలు తిప్పికొట్టేందుకు ఆధార్ కార్డులు చేతపట్టి నిరసన తెలిపారు. తామంతా రాజధాని ప్రాంతానికి చెందినవారమని స్పష్టం చేశారు. జనసేనాని పవన్ కల్యాణ్ తమకు న్యాయం చేయాలనే నినాదంతో ప్లకార్డులు దర్శనమిచ్చాయి. ప్రభుత్వానికి తాము భూములు ఇచ్చామని, తమ భవిష్యత్తు బాధ్యత కేంద్రం తీసుకోవాలని రైతులు డిమాండ్ చేశారు. రాజధానిని అమరావతి నుంచి తరలించొద్దని కోరారు. మూడు రాజధానులు వద్దని... అమరావతే ముద్దు అని నినదించారు.