ప్రేమ వ్యవహారంలో కులం పేరుతో దాడి చేశారని యువకుడి ఆత్మహత్య - young man committed suicide

Young Man Committed Suicide : కులమే ప్రేమకి శత్రువైంది. నిమ్నజాతికి చెందిన ఓ యువకుడు ఉన్నత కులానికి చెందిన యువతిని ప్రేమించటంతో, అతడిపై కులం పేరుతో దాడికి పాల్పడటంతో ఆ వ్యక్తి ఆత్మహత్యకు పాల్పడిన సంఘటన కూకట్‌పల్లి పోలీస్ స్టేషన్ పరిధిలో చోటు చేసుకుంది. ఈ వ్యవహారంలో బాధితుడి కుటుంబ సభ్యులు ఇచ్చిన ఫిర్యాదు మేరకు పోలీసులు కేసు నమోదు చేశారు.

Young Man Committed Suicide :ప్రేమ వ్యవహారంలో ఓ నిండు ప్రాణం బలైంది.నిమ్నజాతికి చెందిన ఓ యువకుడు ఉన్నత కులానికి చెందిన యువతిని ప్రేమించాడు. అతడిపై కులం పేరుతో దాడికి పాల్పడటంతో ఆ వ్యక్తి ఆత్మహత్యకు పాల్పడిన సంఘటన కూకట్‌పల్లి పోలీస్ స్టేషన్ పరిధిలో చోటు చేసుకుంది. ఈ ఘటనలో నిందితులపై ఎస్సీ, ఎస్టీ అట్రాసిటీ యాక్టు కింద కేసు నమోదు చేసి దర్యాప్తు చేస్తున్నట్లు ఏసీపీ తెలిపారు.

పోలీసులు, బాధితులు తెలిపిన వివరాల ప్రకారం కాకి చిన్న అనే వ్యక్తి తన కుటుంబ సభ్యులతో కలిసి ఎల్లమ్మబండ మహంకాళి నగర్​లో నివాసం ఉంటున్నాడు. చిన్న కుమారుడు కాకి సునీల్(23), ఎంఎన్ఆర్ డిగ్రీ కళాశాలలో బీకాం మూడో సంవత్సరం చదువుతున్నాడు. ఈ క్రమంలోనే సునీల్, ఓ యువతితో గత కొంతకాలంగా ప్రేమలో ఉన్నాడు.

ఆ యువతి ఉన్నత కులానికి చెందినది కావటంతో ఆమె సోదరులు పలు మార్లు సునీల్​పై దాడికి పాల్పడ్డారని బాధితులు ఆరోపించారు. సోమవారం రాత్రి సునీల్ తన సోదరుడితో కలిసి నిజాంపేటలోని ఓ వైన్​షాప్​నకు వెళ్లగా, అక్కడ యువతి సోదరుడు, అతని స్నేహితులు దాడికి పాల్పడ్డారు. అదే రోజు రాత్రి యువతి కుటుంబసభ్యులు, సోదరుడు అతని స్నేహితులు సునీల్ ఇంటి పైకి దాడికి దిగారు.

'దళిత కులానికి చెందిన నీకు, ఉన్నత కులానికి చెందిన మా అమ్మాయి కావాలా' అంటూ యువతి తరఫువారు దాడి చేయటంతో, సునీల్ సైతం ప్రతిదాడికి దిగాడు. సునీల్, యువతి కుటుంబ సభ్యులు ఒకరిపై ఒకరు పోలీసులకు ఫిర్యాదు చేసుకున్నారు. మంగళవారం తెల్లవారుజామున సునీల్ సోదరుడు, నిద్రలేచే సరికి అతను ఇంటి ఆవరణలో ఉన్న మెట్లకు ఉరి వేసుకొని ఆత్మహత్యకు పాల్పడటం చూసి, కుటుంబసభ్యులు పోలీసులకు సమాచారం అందించారు. తన చావుకు తన ప్రియురాలు, ఆమె కుటుంబ సభ్యులే కారణమంటూ మేసేజ్ చేసి సునీల్ ఆత్మహత్యకు పాల్పడ్డాడని, నిందితుల పై ఎస్సీ ఎస్టీ అట్రాసిటీ కేసు, ఆత్మహత్యకు కారణం అయ్యారంటూ కేసు నమోదు చేసుకొని దర్యాప్తు చేస్తున్నామని ఏసీపీ తెలిపారు.