వర్షాల కారణంగా ధాన్యం తడిసి రైతులు అవస్థలు - వెంటనే ధాన్యం కొనుగోలు చేయాలని రైతులు డిమాండ్‌ - Crops Damage Due to Untimely Rains

Yasangi Crop Loss due to Untimely Rains : అన్నదాతలను అకాల వర్షాలు ఆగం చేస్తున్నాయి. నాలుగైదు రోజులుగా వరుసగా కురుస్తున్న వర్షాలకు ధాన్యం తడిసి రైతులు అవస్థలు పడుతున్నారు. వాన కురవడం వల్ల రోజంతా ధాన్యం అరబెట్టడం సాయంత్రానికి తిరిగి కుప్పలుగా వేయడమే తప్ప అధికారులు కొనుగోలు చేయడం లేదని ఆవేదన వ్యక్తం చేస్తున్నారు. చేతికి అందివచ్చిన పంట వర్షార్పణం కావడంతో రైతన్న దిక్కుతోచని స్థితిలో ఉన్నారు.

Water soaked grain in Procurement centers :అకాల వర్షంతో కామారెడ్డి జిల్లా రైతులు తీవ్ర ఇబ్బందులు ఎదుర్కొంటున్నారు. జిల్లా వ్యాప్తంగా ఉరుములు, మెరుపులు, ఈదురుగాలులతో కూడిన వర్షం కురుస్తుంది. దీంతో ఆడ్లూర్, టేక్రియాల్, లింగాపూర్, దోమకొండ మండలంలోని సంగమేశ్వర్, బిక్కనూర్ మండలంలోని వరి కొనుగోలు కేంద్రాలలో ధాన్యం పూర్తిగా నీటి మునిగింది. ఆరుగాలం శ్రమించి కష్టపడి పండించిన పంట వర్షార్పణం అవుతుంటే అన్నదాత దిక్కుతోచని స్థితిలో పడిపోయారు.

రైతులను నిండా ముంచిన అకాల వర్షాలు :వరి పంట కోసి కొనుగోలు కేంద్రానికి తీసుకువచ్చి 20 రోజులు గడిచినప్పటికీ సరైన సమయంలో రైతుల నుంచి సేకరించి కాంటా చేయకపోవడం వల్లనే నష్టపోతున్నామని రైతులు ఆవేదన వ్యక్తం చేశారు. కూలీలు, లారీల కొరత ఉందని తెలిపారు. మరోవైపు ఉదయం పూట ఎండ కొడుతూ సాయంత్రం నాలుగు గంటలు కాగానే వారం రోజులుగా వానలు పడుతున్నాయి.

వర్షం ధాటికి వడ్లు పూర్తిగా తడిచి మొలకలొస్తున్నాయి. ఫలితంగా చేసిన కష్టం నీటిపాలవుతుండటంతో రైతులు కన్నీరు మున్నీరవుతున్నారు. నిన్న పలు మండలాలతో పాటు గ్రామాలలో ఉరుములు, మెరుపులు, ఈదురుగాలులతో కూడిన భారీ వర్షం కురిసింది. దీంతో రైతులు ఆరబెట్టిన ధాన్యం నీటమునిగింది. వరి కొనుగోలు కేంద్రాలు చెరువుల్లా మారిపోయాయి. దీంతో అన్నదాతలు వరి ధాన్యాన్ని కాపాడుకునేందుకు ఎంత ప్రయత్నం చేసినప్పటికీ ఫలితం దక్కలేదు. వరి ధాన్యం కొట్టుకుపోతుంటే ఏమీ చేయలేని స్థితిలో అన్నదాతలు ఆవేదన వ్యక్తం చేశారు.

Officials On Paddy Procurement :జిల్లావ్యాప్తంగా రబీ సీజన్ల్‌లో 41 వేల 309 మంది రైతుల నుంచి 518 కోట్ల విలువగల రెండు లక్షల 35 వేల మెట్రిక్ టన్నుల ధాన్యాన్ని కొనుగోలు చేశామని జిల్లా పౌర సరఫరాల అధికారి తెలిపారు. ఇప్పటివరకు జిల్లావ్యాప్తంగా 70 శాతం వడ్లను కొనుగోలు చేసినట్లు చెప్పారు. ధాన్యం కొనుగోళ్లు నత్తనడకన సాగుతుండటంతో ఇప్పటికైనా ప్రభుత్వం స్పందించి కొనుగోళ్లు త్వరగా పూర్తి చేయాలని రైతులు కోరుతున్నారు.

ఇటీవల కురిసిన భారీ వర్షాలకు పలు ప్రాంతాల్లో జనజీవనం స్తంబించింది. పలు ప్రాంతాల్లో వరదనీళ్లు ఎక్కడికక్కడ నిలిచిపోయాయి. మరో వైపు రైతులు ఆరబెట్టిన ధాన్యం తడిచిపోయాయి. ఉద్యాన పంటలకు తీవ్ర నష్టం వాటిల్లింది.