20 ఏళ్లుగా ఎదురుచూపులు - ఆ రెండు గ్రామాల కల సాకారమయ్యేనా!

వంతెన కోసం 20 ఏళ్లుగా విన్నపాలు చేస్తున్న సీపూడి, కాశీపూడి గ్రామస్థులు - ఇచ్చిన మాట నిలబెట్టుకోని నేతలు

Villages Suffering For 20 Years On Bridge issue in Seepudi and Kashipudi :ఒక వంతెన నిర్మిస్తే రెండు గ్రామాల ప్రజలకు ప్రయాణ దూరం తగ్గడంతోపాటు, సమయం కూడా ఆదా అవుతుంది. వంతెన కోసం 20 ఏళ్లుగా ఆశగా ఎదురుచూస్తున్నారు. ప్రభుత్వాలు మారుతున్నాయి తప్ప ఆ గ్రామాల ప్రజలకు మాత్రం వంతెన నిర్మాణం కలగానే మిగిలిపోతుంది. కూటమి ప్రభుత్వం అయినా తమ బాధను అర్ధం చేసుకోవాలని కృష్ణా జిల్లా గుడివాడ మండలం సీపూడి, కాశీపూడి గ్రామస్థులు కోరుతున్నారు.

కృష్ణా జిల్లా గుడివాడ మండలంలోని చిట్టచివర గ్రామాలు సీపూడి, కాశీపూడి. ఈ గ్రామాలకు అనుసంధానంగా పెద కాలువపై వంతెన నిర్మాణం చేయాలని ఏళ్లుగా విన్నపాలు చేస్తున్నారు. వంతెన నిర్మాణం చేస్తామని హమీ ఇచ్చిన వైఎస్సార్సీపీ ప్రభుత్వం ఎటువంటి చర్యలు తీసుకోలేదు. ఈ రెండు గ్రామాలకు వెళ్లాలంటే ఈదులమద్దాలిలో నుంచి చంద్రయ్య కాలువపై ఉన్న వంతెన మీదుగా వెళ్లాలి. వీరికి ఈ మార్గం ఒక్కటే దిక్కు. ఈ రెండు గ్రామాల ప్రజలు వివిధ పనుల నిమిత్తం నిత్యం గుడివాడకు రాకపోకలు సాగిస్తుంటారు. వంతెన లేక చుట్టూ తిరిగి గుడివాడ వెళ్తున్నామని రహదారి కూడా అధ్వానంగా ఉందని గ్రామస్థులు ఆవేదన వ్యక్తం చేస్తున్నారు.

కాంగ్రెస్ హయంలో సీపూడిలోని పెద కాలువపై వంతెన నిర్మాణం చేస్తామని చెపితే ప్రజలు చందాలు వేసుకుని నిధులు కూడా సమకుర్చారు. అప్పట్లోనే టెండర్లు కూడా పూర్తయ్యాయని, పనులు మాత్రం ప్రారంభం కాలేదని స్థానికులు చెబుతున్నారు. ప్రస్తుతం చంద్రయ్య కాలువపై వంతెన కూడా ప్రమాదకరంగా ఉందని తెలిపారు. చంద్రయ్య కాలువపై ఉన్న వంతెన కూలిపోతే తమ రెండు గ్రామాలకు ఇతర గ్రామాలతో సంబధాలు తెగిపోతాయని అంటున్నారు. పెద కాలువపై వంతెన నిర్మాణం గురించి అప్పటి ఎమ్మెల్యే కొడాలి నానికి అనేకసార్లు విన్నవించినా ఫలితంలేదని వాపోయారు.

వంతెన నిర్మాణం చేస్తామని ఎమ్మెల్యే వెనిగండ్ల రాము హమీ ఇచ్చారని స్థానికులు తెలిపారు. ఈ వంతెన నిర్మాణానికి 2కోట్ల 30లక్షలతో అంచనాలు కూడా సిద్ధం చేసినా పనులు ప్రారంభం కావడం లేదని చెబుతున్నారు. వంతెన కోసం 20 ఏళ్లుగా ఎదురుచూస్తునే ఉన్నా తమ కల తీరే దారే కనిపించడం లేదని రెండు గ్రామాల ప్రజలు అవేదన వ్యక్తం చేస్తున్నారు. కూటమి ప్రభుత్వంలోనైనా వంతెన నిర్మాణం చేయాలని విజ్ఞప్తి చేస్తున్నారు.