నెయ్యిలో జంతువుల కొవ్వు కలిసింది - నాణ్యమైన నెయ్యి అంత తక్కువ ధరకు ఎలా ఇస్తారు? : టీటీడీ ఈవో - TTD EO on Laddu Controversy

TTD EO Comments on Tirumala Laddu Controversy: లడ్డూ నాణ్యతగా ఉండాలంటే నెయ్యి నాణ్యంగా ఉండాలని ఈవో టీటీడీ ఈవో శ్యామలరావు చెప్పారు. తిరుమల లడ్డూలో కల్తీ వ్యవహారం దేశవ్యాప్తంగా కాకరేపుతున్న వేళ తాజాగా ఆయన స్పందించారు. 4 ట్యాంకర్లలోని నెయ్యిని 10 ప్రయోగశాలలకు పంపినట్లు ఈవో తెలిపారు. నెయ్యి నాణ్యత నిర్ధరణ కోసం ఎన్‌డీడీబీ ల్యాబ్‌కు పంపినట్లు వెల్లడించారు.

TTD EO Comments on Tirumala Laddu Controversy:తిరుమల శ్రీవారి ప్రసాదం లడ్డూలో కల్తీ వ్యవహారం దేశవ్యాప్తంగా కాకరేపుతున్న వేళ టీటీడీ ఈవో శ్యామలరావు స్పందించారు. శ్రీవారి లడ్డూ నాణ్యతపై కొంతకాలంగా ఫిర్యాదులు వస్తున్నాయని తెలిపారు. లడ్డూ నాణ్యతపై పోటు సిబ్బందితో మాట్లాడానని వారు కూడా అసంతృప్తి వ్యక్తం చేశారని అన్నారు. లడ్డూ నాణ్యతగా ఉండాలంటే నెయ్యి నాణ్యంగా ఉండాలని ఈవో చెప్పారు. నెయ్యి నాసిరకంగా ఉందని గుత్తేదారుకు చెప్పామని ఆ నాణ్యతా లోపాన్ని నేను కూడా గమనించానని అన్నారు. నెయ్యి నాణ్యత నిర్ధరణకు టీటీడీకి సొంత ప్రయోగశాల లేదని నాణ్యత నిర్ధారణ కోసం బయట ల్యాబ్స్‌పై ఆధారపడాల్సిన పరిస్థితి ఉందని వెల్లడించారు. నెయ్యి నాణ్యతపై అధికారులు గతంలో పరీక్షలు చేయలేదని తెలిపారు.

రూ.411కే కిలో నెయ్యి సరఫరా చేశారని నాణ్యమైన నెయ్యిని అంత తక్కువ ధరకు ఎవరూ సరఫరా చేయలేరని ఈవో వివరించారు. మేం హెచ్చరించిన తర్వాత గుత్తేదారులు నాణ్యత పెంచారని తెలిపారు. జంతువుల కొవ్వు నెయ్యిలో కలిసినట్లు ఎన్‌డీడీబీ తేల్చిందని ఈవో అన్నారు. నెయ్యి తీవ్ర కల్తీ జరిగిందని తేలిన వెంటనే ఎలాంటి చర్యలు తీసుకోవాలనే అంశంపై కమిటీ వేసినట్లు వివరించారు. రూ.75 లక్షల విలువైన నెయ్యి నాణ్యత పరికరాలను ఎన్‌డీడీబీ విరాళంగా ఇచ్చిందని ఈవో వెల్లడించారు. తమిళనాడుకు చెందిన ఏఆర్‌ ఫుడ్స్‌ సరఫరా చేసిన నెయ్యిలో కల్తీ జరిగిందని తెలిపారు.

రెండు విభాగాలుగా ల్యాబ్​ రిపోర్టులు: 4 ట్యాంకర్లలోని నెయ్యిని 10 ప్రయోగశాలలకు పంపినట్లు టీటీడీ ఈవో తెలిపారు. నెయ్యి నాణ్యత నిర్ధరణ కోసం ఎన్‌డీడీబీ ల్యాబ్‌కు పంపినట్లు వెల్లడించారు. ఎన్‌డీడీబీ ల్యాబ్‌ అనేది చాలా ప్రముఖమైనదని ఆ ల్యాబ్‌ గుజరాత్‌లోని ఆనంద్‌లో ఉందని అన్నారు. ల్యాబ్‌ పరీక్షల్లో నెయ్యి నాణ్యత లేదని తేలిందని అన్నారు. జులై 6న నెయ్యిని ప్రయోగశాలలకు పంపామని వారంలో ల్యాబ్‌ నివేదికలు వచ్చాయని తెలిపారు. ల్యాబ్‌ రిపోర్టులు రెండు విభాగాలుగా ఇచ్చారని ఆ రిపోర్టులో నెయ్యిలో భారీగా కల్తీ జరిగినట్లు నివేదికలు తేల్చాయని వివరించారు. 100 పాయింట్లు ఉండాల్సిన నెయ్యి నాణ్యత 20 పాయింట్లే ఉందని ఈవో శ్యామలరావు అన్నారు.