"పేరుకే కారు డ్రైవర్లు" - అంతా ఇంటిపని, వంట పని - వైఎస్సార్సీపీ హయాంలో అడ్డగోలు నియామకాలు - Illegal appointments

Govt Employees Works in YSRCP Leaders House?: అప్పటి అధికార పార్టీ నాయకులు చెప్పారంటూ జిల్లా యంత్రాంగం నిబంధనలు ఉల్లంఘించింది. ఏదైనా శాఖలో పరిపాలనా పరంగా అవసరమైతేనే ఉద్యోగులను తాత్కాలిక పద్ధతిపై తీసుకోవాలనే విషయాన్ని విస్మరించింది. మార్గదర్శకాలకు భిన్నంగా ఇష్టారీతిన నియామకాలు చేపట్టింది. చేసేందుకు పని లేకపోవడంతో వీరిలో పలువురు అధికారుల, వైఎస్సార్సీపీ నేతల సేవల్లో తరిస్తున్నారు. జీతాలు ప్రభుత్వ శాఖల నుంచి పొందుతున్నారు.

Govt Employees Works in YSRCP Leaders House? : ప్రకాశం జిల్లా నీటి యాజమాన్య సంస్థ కార్యాలయం (DWMA, డ్వామా)లో ఆప్కాస్‌ కింద 200 మంది, ఫిక్స్‌డ్‌ టెన్యూర్‌ ఎంప్లాయీస్‌ (ఎఫ్‌టీఈ) కింద మరో 400 మంది ఉద్యోగులు విధులు నిర్వహిస్తున్నారు. ఆప్కాస్‌ ఉద్యోగులకు సీనియారిటీ ఆధారంగా రూ.15 వేల నుంచి రూ.18 వేల వరకు జీతాలు చెల్లిస్తున్నారు. డ్వామా పీడీ నుంచి అదనపు పీడీ, వాటర్‌షెడ్‌ ఏపీడీ, జిల్లా విజిలెన్స్‌ అధికారి, క్లస్టర్‌ ఏపీడీల వరకు అందరూ జిల్లా పర్యటన నిమిత్తం కార్లను ఒప్పంద ప్రకారం నెల వారీ అద్దె ప్రాతిపదికన తీసుకుంటారు.

డ్వామా కార్యాలయంలో మొదటి నుంచీ ప్రభుత్వ పరంగా కార్లే లేవు. అయినా ఇక్కడ 2 డ్రైవర్‌ పోస్టులను భర్తీ చేశారు. సదరు డ్రైవర్లను పొరుగు సేవల కింద ఎంపిక చేసి కలెక్టరేట్‌కు కేటాయించారు. ఎఫ్‌టీఈ కింద ఎంపిక చేసిన ముగ్గురు కలెక్టర్‌ క్యాంప్‌ కార్యాలయంలో సహాయకులుగా కొనసాగుతున్నారు. సంయుక్త కలెక్టర్‌ క్యాంపు కార్యాలయంలో మరో ఇద్దరు పని చేస్తున్నారు. డ్వామా పీడీ ఇంట్లోనూ ఇద్దరు విధులు నిర్వహిస్తున్నారు. వీరంతా డ్వామా నుంచి జీతం పొందుతున్నా, అధికారుల ఇళ్లకు మార్కెట్‌ నుంచి కూరగాయలు, పాలు తేవడం, వంట తయారీ, ఇతరత్రా పనులే చేస్తున్నారన్న విమర్శలు ఉన్నాయి. శ్రీశైలం ప్రాజెక్ట్‌ కింద యర్రగొండపాలెం, దోర్నాల, పుల్లలచెరువు, మండలాల్లోని ఆయా కార్యాలయాల్లోనూ మరో ఇవరై మంది ఇదే తీరున విధులు నిర్వహిస్తున్నారు.

వైఎస్సార్సీపీ నేతల ఇళ్లలో పనులు : పేరుకు వారు పారిశుద్ధ్య కార్మికులే అయినా ఎప్పుడూ పార పట్టరు. తట్ట ఎత్తరు. విధులకూ హాజరు కారు. మేస్త్రీ హోదాలో చెలామణి అవుతూ మిగతా వారిపై మాత్రం పెత్తనం చెలాయిస్తున్నారు. వీరికి ఒంగోలు నగరపాలక సంస్థ మాత్రం ప్రతి నెలా ఠంఛనుగా జీతం చెల్లిస్తుంటుంది.

ఎన్డీయే కూటమి ప్రభుత్వం అధికారంలోకి వచ్చాక అడ్డగోలు వ్యవహారంపై ప్రత్యేక దృష్టి సారించింది. గత వైఎస్సార్సీపీ ప్రభుత్వంలో 106 మందిని అడ్డగోలుగా నాటి వైఎస్సార్సీపీ ప్రజాప్రతినిధులు, నేతల సిఫార్సులతో నియమితులైనట్లు ప్రాథమికంగా గుర్తించింది. వీరిలో కొందరు సదరు నేతల నివాసాల్లో పనులు చేస్తున్నట్లు తెలుసుకున్నారు. ఈ విషయమై ఓఎంసీ కమిషనర్‌ వెంకటేశ్వరరావు ఇటీవల ఆగ్రహం వ్యక్తం చేశారు. దీంతో తాము పార పట్టలేమంటూ 20 మంది వరకు స్వచ్ఛందంగా తప్పుకొన్నట్లు సమాచారం.

గిద్దలూరు నగర పంచాయతీలోనూ వైఎస్సార్సీపీ హయాంలో 10 మంది వరకు పారిశుద్ధ్య కార్మికులుగా నియమితులయ్యారు. వీరంతా వైఎస్సార్సీపీ కౌన్సిలర్ల నివాసాల్లో పనిమనుషులుగా, కారు డ్రైవర్లుగా పనిచేస్తూ ప్రభుత్వం నుంచి జీతాలు పొందారు. ఈ విషయమై 'ఈనాడు'లో కథనం ప్రచురితం కావడంతో వారందరినీ అధికారులు వెనక్కి పిలిచారు.