RS 7 Crore Value Drugs Seized in Hyderabad : హైదరాబాద్ మహానగరంలో రోజురోజుకూ మత్తు మాఫియా రెచ్చిపోతుంది. భాగ్యనగరాన్ని మాదక ద్రవ్యాల నిషేధ నగరంగా తీర్చాలన్న కలకు కొందరు మత్తుగాళ్లు తూట్లు పొడుస్తున్నారు. కానీ పోలీసులు మాత్రం డ్రగ్స్ తరలిస్తున్న నేరగాళ్లను, మత్తు పదార్థాలను స్వాధీనం చేసుకుంటున్నారు. తాజాగా మహానగరంలో భారీ ఎత్తున హెరాయిన్ను నార్కోటిక్స్ పోలీసులు పట్టుకున్నారు. నగరంలోని శిల్పారామం సమీపంలో అమ్మకానికి సిద్ధంగా ఉంచిన రూ.7 కోట్ల విలువైన కిలో హెరాయిన్, నాలుగు స్మార్ట్ఫోన్లను స్వాధీనం చేసుకున్నారు. ఈ క్రమంలో నలుగురు నిందితులను అరెస్టు చేశారు.
ఈ సందర్భంగా సైబరాబాద్ పోలీస్ కమిషనర్ అవినాశ్ మహంతి మాట్లాడుతూ, శంషాబాద్ ఎస్వోటీ, మాదాపూర్ పోలీసులతో కలిసి నార్కోటిక్ బ్యూరో సహాయంతో స్పెషల్ ఆపరేషన్ నిర్వహించి నిందితులతో పాటు పెద్ద ఎత్తున హెరాయిన్ను పట్టుకున్నామని వెల్లడించారు. ఈ నలుగురు నిందితులు రాజస్థాన్కు చెందిన వారిగా గుర్తించామని తెలిపారు. కిలో హెరాయిన్ను నాలుగు ప్యాకెట్లలో ఒక్కొక్కటి 250 గ్రాములుగా ప్యాక్ చేసి తీసుకువచ్చారని సీపీ వివరించారు.
రాజస్థాన్ నాగౌర్ జిల్లాకు చెందిన సంతోశ్ ఆచారి అనే వ్యక్తి ప్రస్తుతం జోధ్పూర్ జైలులో ఉన్నాడని, ఇతను జైలుకు వెళ్లేప్పుడు తన వద్ద ఉన్న హెరాయిన్ను నేమి చందు అనే వ్యక్తికి ఇచ్చాడని సైబరాబాద్ సీపీ అవినాశ్ మహంతి చెప్పారు. నేమి చందు తన వద్ద ఉన్న హెరాయిన్ను ఇతరులకు విక్రయించడానికి హైదరాబాద్ నగర శివారు అబ్దుల్లాపూర్మెట్లో నివాసం ఉంటున్న తన సోదరుడు అయాజ్ భాటి వద్దకు వచ్చాడని తెలిపారు. పక్కా ప్రణాళిక ప్రకారంగా నేవీ చందు మరో నిందితుడు నర్పత్ సింగ్ కిలో హెరాయిన్ను రాజస్థాన్ నుంచి స్వీట్స్ మాటున బస్సులో హైదరాబాద్కు తీసుకువచ్చారని సీపీ పేర్కొన్నారు.