ఫేక్​ యాప్​తో రూ.20కోట్ల భారీ మోసం- లబోదిబోమంటున్న బాధితులు - Fake APP 20 Crores Rupees Fraud

Fake APP 20 Crores Rupees Fraud: చిత్తూరు జిల్లాలో కోట్ల రూపాయల్లో భారీ మోసం వెలుగులోకి వచ్చింది. డ్వాక్రా పర్సన్లు వ్యాప్తి చెందించిన ఫేక్ యాప్​లో పెట్టుబడులు పెట్టి 20కోట్ల రూపాయలను మోసపోయామని బాధితులు లబోదిబోమంటున్నారు.

Fake APP 20 Crores Rupees Fraud:ఇటీవల కాలంలో సైబర్ నేరాలు కోకొల్లలుగా వెలుగుచూస్తున్నాయి. ఎప్పటికప్పుడు తమ పంథాను మార్చుకుంటూ సైబర్ నేరగాళ్లు వలలు పన్నుతున్నారు. కాదేదీ సైబర్​ నేరగాళ్లకు అనర్హం అన్నట్లుగా తయారైంది నేటి పరిస్థితి. ప్రజలను మోసగించేందుకు ఉన్న ఏ ఒక్క అవకాశాన్నీ వదలకుండా సాంకేతికతను ఉపయోగించి ప్రజల సొమ్ము కాజేస్తున్నారు. తాజాగా చిత్తూరు జిల్లా పలమనేరులో 20 కోట్ల రూపాయల భారీ మోసం వెలుగు చూసింది. ఈజీగా ఆన్​లైన్​లో భారీగా డబ్బులు సంపాదించవచ్చనే ఆశ చూపించి మోసం చేశారని బాధితులు లబోదిబోమంటున్నారు.

బాధితులు తెలిపిన వివరాల ప్రకారం:డీఏఏఐ అనే ట్రేడింగ్ యాప్​ (DAAI APP)ను డ్వాక్రా పర్సన్లు పలమనేరులో వ్యాప్తి చేశారు. ఈ యాప్​లో పెట్టుబడులు పెడితే అధిక లాభాలు వస్తాయని ఆశచూపించారు. దీంతో దాదాపు 5 వేలమంది సుమారు 20 కోట్ల రూపాయలను పెట్టుబడులుగా ఈ యాప్​లో పెట్టినట్లు బాధితులు తెలిపారు. ద్విచక్ర వాహనాలను అమ్మి, బంగారాన్ని తాకట్టి పెట్టి వడ్డీలకు నగదు తెచ్చిమరీ యాప్​లో పెట్టి నిండా మునిగిపోయామని వాపోతున్నారు.

రాత్రికి రాత్రే యాప్ పనిచేయటం ఆగిపోవటంతో బాధితులు ఒక్కొక్కరుగా రోడ్డెక్కుతున్నారు. చేసేదేం లేక తమ డబ్బును ఇప్పించాలని పలమనేరు డీఎస్పీ రఘువీర్​ విష్ణును ఆశ్రయించారు. డ్వాక్రా రిసోర్స్ పర్సన్లు తమ కొంపముంచారని డీఎస్పీ ఎదుట భాదితులు తమ గోడును వెళ్లగక్కారు. ఈ నేపథ్యంలో బాధితుల నుంచి వివరాలు సేకరించిన పోలీసులు విచారణ చేపట్టారు. ఘటనపై కేసు నమోదు చేసి దర్యాప్తు చేపట్టినట్లు డీఎస్పీ రఘువీర విష్ణు తెలిపారు.