'కర్రల సమరానికి' సిద్ధమైన దేవరగట్టు - నిఘా పెంచిన పోలీసులు - తగ్గేదేలే అంటున్న గ్రామస్థులు

దేవరగట్టు కర్రల సమరానికి రంగం సిద్ధం. సంప్రదాయ ఉత్సవంలో హింస జరిగిన వెనక్కి తగ్గని గ్రామస్థులు. హింస లేకుండా చేయాలని పట్టుదలతో పోలీసులు. దసరా రోజు బన్ని ఉత్సవాలు ప్రారంభం

Devaragattu Bunny Utsavam 2024 : దసరా పండగ వచ్చిందే అన్ని ప్రాంతాల్లో దుర్గమ్మకు పూజలు, సాయంత్రం అయితే రావణ దహనంతో వేడుక ముగుస్తుంది. కానీ ఆప్రాంతంలో మాత్రం వీటితో పాటు ఒక ఆసక్తికరమైన సన్నివేశం ఉంటుంది. అదే కర్రల సమరం. ఎంతమందికి గాయాలైన, ప్రాణాలు పోయిన లెక్కచేయకుండా ఆ ప్రాంతంలో కర్రలతో కొట్టుకుంటారు. ఇప్పటికే అర్థమైపోయి ఉంటుంది మీకు అదే కర్నూలు జిల్లా దేవరగట్టు. ఇప్పుడు దసరా పండగ కావడంతో దేవరగట్టు కర్ర సమరానికి సిద్ధమైంది. ఆ సంప్రదాయ ఉత్సవంలో హింస చెలరేగి ఎంతో మందికి గాయాలైన, ఆచారాన్ని మాత్రం అక్కడి ప్రజలు వదిలిపెట్టరు. ఈ సంవత్సరం అయినా హింసకు తావులేకుండా బన్ని ఉత్సవాలు నిర్వహించాలని పోలీసులు పట్టుదలతో ఉన్నారు.

దేవరగట్టు బన్నీ ఉత్సవం అంటే ఏమిటి? : కర్నూలు జిల్లా దేవరగట్టులో ప్రతి దసరా పండగకు ముందు రోజు రాత్రి కర్రల సమరం ఏళ్ల తరబడి జరుగుతోంది. దేవరగట్టు వద్ద కొండపై వెలిసిన మాళమల్లేశ్వరస్వామి ఆలయంలో దేవతామూర్తులైన మాళమ్మ, మల్లేశ్వరస్వామికి దసరా పండుగన అర్ధరాత్రి 12 గంటలకు కల్యాణం జరిపిస్తుండటం ఆనవాయితీ.

కల్యాణం అనంతరం కొండ పరిసరాల్లోని ఉన్న పాదాలగట్టు, రక్షపడ, శమీవృక్షం వాటి ఎదురుగా ఉన్న బసవన్నగుడి ప్రాంతాల్లో దివిటీల వెలుతురులో ఉత్సవ విగ్రహాలను ఊరేగిస్తారు. ఆ విగ్రహాలను దక్కించుకోవడం కోసం నెరణికి, నెరణికి తండా, కొత్తపేట గ్రామాల ప్రజలు ఒక జట్టుగా కడతారు. ఆలూరు, సుళువాయి, ఎల్లార్తి, నిడ్రవట్టి, అరికెర, బిలేహాల్​ గ్రామస్థులు మరో జట్టుగా ఏర్పడి కర్రలతో తలపడతారు. దీన్నే బన్ని ఉత్సవం అని కూడా పిలుస్తారు.

పోలీసుల ముమ్మర భద్రత : ఈ కర్రల సమరాన్ని చూసేందుకు పక్కనే ఉన్న తెలంగాణ, కర్ణాటక నుంచి కూడా పెద్ద ఎత్తున భక్తులు తరలివెళతారు. ఉత్సవ ఏర్పాట్లపై ఆ జిల్లా కలెక్టర్​, ఎస్పీ అధికారులతో సమీక్ష నిర్వహించారు. అధికారులు, పోలీసులు కలిపి గ్రామాల్లో అవగాహన కార్యక్రమాలు నిర్వహించారు. ఈ క్రమంలో రింగులు తొడిగిన కర్రలను స్వాధీనం చేసుకున్నారు. మద్యాన్ని నియంత్రించేందుకు తనిఖీలు ముమ్మరంగా చేస్తున్నారు.

భద్రతలో భాగంగా దేవరగట్టు పరిసరాల్లో విద్యుత్​ దీపాలు, సీసీటీవీలు ఏర్పాటు చేశారు. డ్రోన్ల ద్వారా ఉత్సవ దృశ్యాలను రికార్డు చేస్తామని అధికారులు తెలిపారు. ముఖ్యంగా బన్ని ఉత్సవాల్లో హింసను అరికట్టాలని న్యాయస్థానాలు ఆదేశాలు జారీ చేసినా ఫలితం లేకుండా పోయింది. ఈ ఉత్సవాలను అధికారులే దగ్గరుండి నిర్వహిస్తున్నారని ఆరోపణలు వస్తున్నాయి.