రెండు వారాలుగా తీవ్రమైన నడుము నొప్పితో బాధపడుతున్న పవన్‌ కళ్యాణ్​

పంచాయతీరాజ్, గ్రామీణాభివృద్ధిపై సమీక్ష- ఆరోగ్యం సహకరించక ఉపముఖ్యమంత్రి సమావేశానికి రాలేదని తెలిపిన మంత్రి నాదెండ్ల మనోహర్‌

Deputy CM Pawan Kalyan Suffering With Severe Back Pain : రాష్ట్ర సచివాలయంలో మంత్రులు, కార్యదర్శులతో ముఖ్యమంత్రి చంద్రబాబు మంగళవారం నిర్వహించిన సమావేశానికి ఉపముఖ్యమంత్రి పవన్‌ కల్యాణ్‌ హాజరుకాలేదు. పంచాయతీరాజ్, గ్రామీణాభివృద్ధిపై సమీక్ష ప్రారంభమయ్యే సమయంలో పౌరసరఫరాల శాఖ మంత్రి నాదెండ్ల మనోహర్‌ జోక్యం చేసుకుని పవన్‌ రెండు వారాలుగా తీవ్రమైన నడుము నొప్పితో బాధపడుతున్నారని, అందుకే సమావేశానికి రాలేదని తెలిపారు. రెండు మూడు రోజుల్లో విధులకు హాజరవుతారని తెలిపారు. దానికి సీఎం స్పందిస్తూ ఆయనతో మాట్లాడేందుకు ప్రయత్నించానని, దొరకలేదని, ఇప్పుడెలా ఉన్నారని అడిగారు. ఇప్పుడు కాస్త పర్వాలేదని మనోహర్‌ పేర్కొన్నారు.

ఏ శాఖ కార్యదర్శి ఆ శాఖ మంత్రి పక్కనే

• ఈ సమావేశానికి ప్రత్యేక ప్రధాన కార్యదర్శులు, ముఖ్య కార్యదర్శులు, కార్యదర్శులనే పిలిచారు. ఏ శాఖ కార్యదర్శిని ఆ శాఖ మంత్రి పక్కనే కూర్చోబెట్టారు.
• కార్యదర్శులు పవర్‌ పాయింట్‌ ప్రజంటేషన్‌ ఇచ్చేటప్పుడు తెరపై టైమర్‌ కనిపించే ఏర్పాటు చేశారు. ప్రజంటేషన్‌ ప్రారంభించగానే టైమర్‌ మొదలవుతుంది. సుదీర్ఘ ప్రజంటేషన్లను నివారించి, అధికారులకు ఎప్పటికప్పుడు సమయం గుర్తుచేసేందుకు ఈ ఏర్పాటు చేశారు. అయినా కొందరు వారికి ఇచ్చిన సమయానికి మించే ప్రజంటేషన్లు చేశారు.